Գյումրու քաղաքապետը ստուգում է նախկին քաղաքապետի արածն ու չարածը

«Ինչպես վաղօրոք հայտարարվել էր, Գյումրու քաղաքապետարանի կողմից իրականացվում է գույքագրում քաղաքի ենթակայության տակ գործող բոլոր օբյեկտներում և սպասարկման ծառայություններ մատուցող ընկերություններում։ Տրանսպորտի ոլորտը ևս գտնվում է մոնիթորինգի տակ, կատարվում են ուսումնասիրություններ, իսկ արդյունքների մասին այս պահին ոչինչ ասել չեմ կարող. կտեղեկացնենք ավարտից հետո»։ Այս մասին Lurer.com-ի հետ զրույցում ասաց Գյումրու նորընտիր քաղաքապետ Սամվել Բալասանյանի մամուլի խոսնակ Զոհրաբ Եգանյանը։

Լրագրողի այն հարցին, թե ինչպես էին նախկինում իրականցվում ստուգումները, խոսնակը պատասխանեց. «Նախկինում իրականացման մասով այս պահին նույնպես ոչինչ ասել չեմ կարող։ Ուղղակի տրանսպորտի հետ կապված քաղաքապետարանը պետք է ստուգի մեզ մոտ եղած փաստաթղթերի և իրականում գործող երթուղայինների քանակի և երթուղիների համապատասխանեցումը։ Երբ ավարտենք այդ ուսումնասիրությունները, պարզ կլինեն ներկայի և նախկինի տարբերությունները»։

Լրագրողի այն հարցին, թե երթուղայինների վարորդները գործադուլ կազմակերպել են, վերջինս ասաց, որ ինքը գործադուլի մասին տեղեկություն չունի։