Շատ լուրջ բացթողում է քաղաքային իշխանությունների կողմից. Քաղաքագետը հրապարակում հնչող ՌԴ հիմնի վերաբերյալ

Այսօր Lurer.com-ը ներկայացրել էր մի տեսանյութ, որում երևում է, թե ինչպես են Հանրապետության Հրապարակում երգող շատրվանները պարում Ռուսաստանի Դաշնության պետական հիմնի հնչյունների ներքո:

Այս մասին Lurer.com-ը զրուցեց Times.am կայքի խմբագիր, քաղաքագետ Հրանտ Մելիք-Շահնազարյանի հետ, ով սա որակեց լուրջ բացթողում։

«Կարծում եմ, որ սա իսկապես շատ լուրջ բացթողում է քաղաքային իշխանությունների կողմից և վկայում է այն մասին, որ ինչ-որ ոլորտներում իսպառ բացակայում է պետական մտածելակերպը»,- ասաց քաղաքագետը և հավելեց,-«Ընդհանուր առմամբ՝ մեր իշխանությունները պետք է բոլոր մակարդակներում ուշադիր լինեն նման բացթողումների նկատմամբ, որովհետև նոր պետականություն ձեռք բերած հասարակության համար չափազանց կարևոր է սեփական արժեքներով դաստիարակվելը, պետք է մեծ ուշադրություն դարձվի մեր պետության սիմվոլների քարոզչությանը»։

Քաղաքագետը կարծում է, որ մեր պետության խորհրդանիշների ճիշտ ու նպատակային քարոզչությունը կնպաստի պետական մտածելակերպի զարգացմանը և կաջակցի հայրենքի հետ կապվելու մարդկանց հնարավորություններին, ում կարծիքով հակառակը անթույլատրելի է։

«Կարծում եմ՝ այս բացթողման պատասխանատվությունն ընկնում է քաղաքային իշխանությունների վրա»,-հավելեց վերջինս։