Խաչաղբյուր 2 ՀԷԿ-ի նախագիծն ուղղակի արտագրված է

Վերջին լուրեր 20 Հոկտեմբեր, 2012 17:24

«Ներկայացված նախագիծը լուրջ վերանայման կարիք ունի, և պետք է անհապաղ չեղյալ ճանաչվի տրված դրական եզրակացությունը»,- լրագրողների հետ հանդիպմանը Խաչաղբյուր 2 ՀԷԿ-ի մասին այսպես արտահայտվեց իրավաբան Մերի Խաչատրյանը։

Բնապահպան Լևոն Գալստյանը նշեց, որ ՀԷԿ-ի կառուցման համար ներկայացված փաստաթղթերի տվյալները չեն համապատասխանում իրականությանը և կան մի շարք լուրջ խախտումներ.

«ՀԷԿ-ի կառուցման նախագծում նշվում է, որ խողովակաշարի երկարությունը լինելու է 2758 մետր, իսկ բնապահպանական մասում նշված է 2450 մետր։

Նախագծում նշվում է, որ արտադրվելու է 15.9 մլն. կվտ/ժամ էլեկտրաէներգիա, իսկ բնապահպանական մասում նշված է 12.5 մլն. կվտ/ժամ։

Նախագծում նշվում է, որ աշխատանքները իրականացնելու համար առկա են անհրաժեշտ բոլոր տրանսպորտային ճանապարհները, սակայն տեղում ակնհայտ է դառնում, որ ոչ մի ճանապարհ չի եղել, իսկ խողովակաշարը անցնելու է անտառապատ տարածքով, հետևաբար անտառահատումը անխուսափելի է, իսկ մի մասը արդեն կատարվել է։ Անզեն աչքով երևում է մոտ 100 հատված ծառեր, իսկ թե որքանն է տեղափոխվել կամ մնացել հողի տակ հայտնի չէ։

Նախագծում նշվում է, որ ՀԷԿ-ի բնապահպանական վնասները գրեթե զրոյական են, քանի որ օգտագործվում է արդեն գոյություն ունեցող ջրային սխեմա։ Այստեղից ակնհայտ է դառնում, որ նախագիծը ոչ մի հիմք չունի, այլ ուղղակի արտագրված է այլ նախագծերից, քանի որ ջրային սխեմաները օգտագործվում են միայն արհեստական ջրատարների վրա, իսկ բնական գետերի վրա չի կարող օգտագործվել գոյություն ունեցող ջրային սխեմաներ։

Նախագծում նշվում է, որ ՀԷԿ-ի կառուցման տարածքները հիմնականում դասվում են անօգտագործելի քարքարոտ հողերի կատեգորիային։ Ինչպե՞ս կարող է անտառածածկ տարածքը դասվել այդ կատեգորիային։

Նշվում է, որ իրականացվել են երկրաբանական և հիդրոերկրաբանական հետազոտություններ, սակայն դրանց արդյունքները չկան»։