Կառավարությունը նախարարներին հարկային հաշվետվությունները «գեղեցկացնելու» ժամանակ է տալիս

Հոկտեմբերի 4-ին Կառավարության հերթական նիստի ժամանակ վարչապետ Տիգրան Սարգսյանը հայտնեց, որ Կառավարության նիստերին հրապարակվելու են նախարարների հաշվետվությունները հարկային պարտավորությունների կատարման և ոլորտում տնտեսական հնարավոր աճի վերաբերյալ:

Առաջինն իրենց նախարարությունների հարկային հաշվետվությունները պետք է ներկայացնեին կրթության և գիտության, տրանսպորտի և կապի ու էներգետիկայի և բնական պաշարների նախարարները: Բայց հոկտեմբերի 4-ից մինչև հիմա Կառավարությունն արդեն երկու նիստ է գումարել, մինչդեռ հաշվետվությունները չկան օրակարգում։

Lurer.com-ը փորձեց ճշտել, թե ինչու օրակարգում ներգրավված չէին հարկային հաշվետվությունները։ ՀՀ վարչապետի մամուլի քարտուղար Հարություն Բերբերյանը պատասխանեց. «Հաշվետվությունները պատրաստվում են նախարարությունների կողմից և ըստ հերթականության, հաջորդ նիստից սկսած, հավանաբար կսկսեն զեկուցել»։

Հիշեցնենք, որ Lurer.com-ի հետ զրույցում ԿԳ նախարար Արմեն Աշոտյանն արդեն ասել էր, որ իր ղեկավարած գերատեսչությունը պատրաստ է ներկայացնել հարկային հաշվետվությունը։ «Հաշվետվությունը պատրաստվել է Կառավարության կողմից պահանջված ձևաչափին համապատասխան»,-ասել էր Արմեն Աշոտյանը և խնդրել, որպեսզի անոնս չանենք իր հաշվետվությանը։  

Թե ինչու չեն ներկայացվել հաշվետվությունները, Lurer.com-ը հարցը ուղղեց նաև Տրանսպորտի և կապի նախարարության մամուլի խոսնակ Անժելա Մարտիրոսյանին, ով մեզ հետ զրույցում ասաց.«Մեր գերատեսչությունը պատրաստ է եղել ներկայացնել հարկային հաշվետվությունը, և այն պետք է ներկայացներ նախարարի առաջին տեղակալ Հրանտ Բեգլարյանը, որովհետև նախարարը պաշտոնական գործուղման մեջ է»։ 

Նույն հարցը ուղղեցինք նաև ՀՀ էներգետիկայի և բնական պաշարների նախարարության մամուլի խոսնակին, ով խնդրեց հարցն ուղարկել էլեկտրոնային հասցեով և խոստացավ օրենքով սահմանված կարգով՝ հինգօրյա ժամկետում պատասխանել, սակայն պետք է արձանագրել, որ հինգ օր հետո տրված ինֆորմացիան ոչ մենք կկարդանք, ոչ էլ՝ իրենք, առավել ևս՝ ընթերցողը։

ՀՀ վարչապետի մամուլի քարտուղար Հարություն Բերբերյանին հարցրինք՝ ինչու ներգրավված չէին հաշվետվությունները, եթե գոնե երկու նախարարությունները փաստացի պատրաստ էին ներկայացնել, վերջինս պատասխանեց, որ  հնարավոր է՝ Կառավարության նիստը խիտ է եղել, այդ պատճառով չեն ներկայացվել, բայց արդեն շուտով կսկեն հրապարակել։

Հ.Գ Մնում է միայն ենթադրել, որ Կառավարությունը պարզապես ժամանակ է տալիս նախարարներին «գեղեցկացնելու» իրենց հարկային հաշվետվությունները։

Նելլի Ավետիսյան