Նոտարների 1-ին խումբը որակավորման ստուգման թեստ հանձնեց

Հայաստանի Հանրապետության արդարադատության նախարարությունում հոկտեմբերի 20-ին ժամը 10:05-ին սկսվել և 12:05-ին ավարտվել է նոտարների թեկնածուների որակավորման ստուգման թեստի առաջին փուլին մասնակցող առաջին խմբի քննությունը: 26 թեկնածուներից քննությանը մասնակցել է 24-ը. երկուսը չեն ներկայացել:

Քննության ավարտից անմիջապես հետո դիմորդների ներկայությամբ ստուգվել են աշխատանքները և ներկայացվել նախնական արդյունքները: 
ՀՀ արդարադատության նախարարությունը, թափանցիկություն ապահովելու նպատակով, քաղաքացիներին քննությանը առցանց հետևելու հնարավորություն է ընձեռել:

Նոտարների թեկնածուների որակավորման ստուգումն անցկացվում է երեք փուլով. առաջինում ստուգվում են թեկնածուների տեսական գիտելիքները, երկրորդ փուլում նրանց մտածելու ունակությունը, իսկ երրորդում՝ հարցազրույցն է նախարարի հետ:

Նոտարի որակավորման ստուգման հետ կապված տեղեկատվությունը և հարցաշարը նախապես ուղարկվել էր դիմորդներին, ինչպես նաև հրապարակվել էր ՀՀ ԱՆ պաշտոնական կայքէջում:

Նոտարների թեկնածուների որակավորման ստուգման թեստի առաջին փուլին մասնակցող երկրորդ խմբի քննությունը նախատեսված էր այսօր ժամը 13:00-ին: