Համերգ-ցուցահանդես՝ նվիրված հայ-ճապոնական դիվանագիտական հարաբերություններին

ՀՀ մշակույթի նախարարության աջակցությամբ «Մշակութային կրթության աջակցության» հիմնադրամը «JAPAR 20» ճապոնական մշակութային կազմակերպության հետ ս. թ. հոկտեմբերի 20-ին ժամը 15:00-ին Հայաստանի ազգային պատկերասրահում իրականացվեց «Ճախրող քամիներ» ցուցահանդես-համերգը, որի համատեքստում ներկայացվեց հայկական դուդուկի, ճապոնական շակուհաչիի և վայելչագրության հիանալի համադրությունը:

Ցուցահանդես-համերգը նվիրվում է հայ-ճապոնական դիվանագիտական հարաբերությունների հաստատման 20-ամյա հոբելյանին: Միջպետական շփումներից զատ, երկուստեք ձևավորվել են նաև տնտեսական, կրթական, մշակութային կապեր, ինչի խոսուն գրավականն է սույն համերգ-ցուցադրությունը: Երկու հինավուրց ազգեր այս ծրագրում ներկայանում են բազմադարյա արվեստի նմուշներով, հանդես գալով ազգային հատկանիշներն արտացոլող ավանդական նվագարաններով: Այս միջոցառումը հայ հասարակությանը հնարավորություն ընձեռեց ծանոթանալու Ծագող արևի երկրի բազմադարյա փիլիսոփայություն ունեցող ավանդական նվագարանին՝ շակուհաչիին, որը ներկայացնում է երգահան-կատարող Կոիչի Յոշիդան: Համերգի ընթացքում շակուհաչի գործիքի հնչյունների ուղեկցությամբ Եկատերինա Նազարովան ներկայացրեց ճապոնական տառարվեստը՝ հիերոգլիֆները: Հայկական դուդուկը և ուղեկից գործիքները /բլուլ, զուռնա/ ներկայացրեց ՀՀ վաստակավոր արտիստ Գևորգ Դաբաղյանը: