Թե ինչին կհանգեցնի ՀԱԿ-ի թուլացումը. ԼՂՀ նախկին արտգործնախարար

ԼՂՀ նախկին արտգործնախարար Արման Մելիքյանը facebook սոցցանցի իր էջում գրել է.

«Հետաքրքիր նոր ներքաղաքական իրողություն է ձևավորվում՝ որքան շատ ակտիվ, աչքի ընկնող կողմնակիցներ կորցնի ՀԱԿ-ը, այնքան ավելի կնվազի նաև ԲՀԿ գործոնի կարևորությունը իշխանության համար պայքարում և, դրան հակառակ, կամրապնդվեն գործող իշխանության դիրքերը: Այսինքն՝ եթե ուժեղ ՀԱԿ-ի պարագայում իշխանությանը կենսականորեն անհրաժեշտ էր լինելու ԲՀԿ-ի աջակցությունը (այդ թվում նաև ուժային), ապա այժմ իշխանությանն անհրաժեշտ է ԲՀԿ-ի հեզ համաձայնողականությունը ապագա նախագահացուին հնազանդորեն աջակցելու տեսանկյունից: Մեծ հաշվով ՀԱԿ-ի թուլացումը հանգեցնելու է նրան, որ վերստին ձևավորվի միաձույլ իշխանական բևեռ, ինչին այսօր նպաստում է նաև ՀԱԿ-ի որդեգրած քաղաքական գիծը՝ ԲՀԿ-ի հետ համագործակցության անհրաժեշտության վերաբերյալ շատերին խրտնեցնող հռչակումներով: Այսօրինակ զարգացումների հնարավոր ցանկալի արդյունք ՀԱԿ-ի համար կարող է դառնալ Ռոբերտ Քոչարյանի մեկուսացումը և վնասազերծումը առաջիկա քաղաքական զարգացումների համատեքստում»: