Զարուհի Բաթոյանը՝ Գալուստ Սահակյանին. «Իսկ հաշմանդամություն ունեցողների մասին ո՞վ պետք է մտածի ԱԺ-ում»

«Արևածաղիկ» մանկապատանեկան ամսաթերթի գլխավոր խմբագիր Զարուհի Բաթոյանը իր բլոգում գրել է.

««Առավոտ» օրաթերթի լրագրող Հռիփսիմե Ջեբեջյանի այն հարցին, թե ինչու ԱԺ-ում թեքահարթակներ չկան ու վերելակն էլ հարմարեցված չէ հաշմանդամություն ունեցող մարդկանց համար, Գալուստ Սահակյանը պատասխանել է. «ԱԺ-ում 1-2 հոգի են ընդամենը հաշմանդամ, Արման Մուշեղյանն է եւ էլի մի հոգի ու իրանց համար ի՞նչ այդքան ծախս անենք, դա լուրջ ծախս է»:

Այո, պարոն Սահակյան, դուք ճիշտ եք, քանի դեռ առիթից առիթ եք հիշում հաշմանդամություն ուենցող մարդկանց համար միջավայրը հարմարեցնելու մասին, դա ոչ միայն ԱԺ-ից, այլ ընդհանրապես բոլորից մեծ ծախսեր կպահանջի: Հենց այդ պատճառով էլ պետք է ի սկբանե մտածել խնդրի մասին: ԱԺ-ում միայն հաշմանդամություն ունեցող մարդիկ կարող են օգնել, որ պետության բյուջեն նպատակային և արդյունավետ օգտագործվի, խուսափելով անտեղի և լրացուցիչ ծախսերից:

Ասեմ ինչպես. օրինակ, եթե ֆինանսներ են հատկացվում քաղաքաշինության ոլորտին, ապա հենց այդ պահից պետք է մտածել, արդյոք հաշմանդամություն ունեցող անձանց կարիքները հաշվի առել են, թե ոչ: Կամ եթե տուրիզմի ոլորտին վերաբերող օրենսդրական նախաձեռնություն է քննարկվում, պետք է ի սկբանե համոզվել, արդյոք այն ապահովում է հավասար պայմաններ բոլորի համար և այլն: Այլապես ավելի ուշ փորձելով հարմարեցնել օրենսդրությունը, ծրագրերը կամ միջավայրը, մենք նոր ներդրումներ և ծախսեր անելու ռիսկի առջև ենք կանգնում: Դա նույնն է, թե բնակարանդ վերանորոգես, դրանից հետո նոր փոփոխություններ նախաձեռնես:

Իսկ այդ մասին ով պիտի ժամանակին մտածի ԱԺ-ում, իհարկե, հաշմանդամություն ունեցող անձը: Այնպես որ, այսօրվա ներդրումը կնպաստի, որ վաղը խնայողություններ անենք, պարոն Սահակյան: Կորած տեղ չէ»: