Սպահանի վրա հարձակումն անպատասխան չի մնա. Իրանի խորհրդարանն զգուշացրել է

Իրանը կպատասխանի Սպահանում պաշտպանության նախարարության օբյեկտի վրա հարձակմանը, Ռիա Նովոստիին տված հարցազրույցում ասել է Իրանի արտաքին քաղաքականության և ազգային անվտանգության խորհրդարանական հանձնաժողովի անդամ Մահմուդ Աբասզադե Մեշկինին։
«Սպահանի վրա հարձակումն անպատասխան չի մնա»,- ասել է նա՝ պատասխանելով հարցին, թե արդյո՞ք պատասխան կլինի Ուկրաինայի նախագահի գրասենյակի ղեկավարի խորհրդական Միխայիլ Պոդոլյակի հայտարարությանը, որն ակնարկում էր Կիևի հնարավոր մասնակցությունը միջադեպին։ 

Նրա խոսքով՝ Ուկրաինան այժմ իրեն թույլ չի տալիս ավելի անկեղծ հարձակումներ, քանի որ գիտի, թե ինչ պատասխան կստանա Թեհրանից։

«Նրանք շատ են վախենում: Որովհետև մենք ոչ մեկի հետ կատակ չենք անում: Մեր կարծիքով, նրանք անսպասելի ոչինչ չեն ասել: Մեզ համար զարմանալի չէ, որ Ուկրաինայի իշխանությունները նման դիրքորոշում են ընդունում, քանի որ նրանք պարզապես կարող են դիրքորոշվել՝ համահունչ արևմտյան հեգեմոնիային»,- ասել է իրանցի պաշտոնյան։

Կիրակի լույս հունվարի 29-ի գիշերը Իրանի կենտրոնական մասի Սպահան քաղաքում ուժգին պայթյուն է որոտացել ռազմական օբյեկտում։ Ինչպես հայտնում են հանրապետության պաշտպանության նախարարությունից, դա անհաջող հարձակման փորձ էր՝ պայթուցիկներով կվադրոկոպերների կիրառմամբ։

Հարձակումից հետո Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը Թվիթերում գրել էր՝ «Ուկրաինան զգուշացրել էր ձեզ»՝ այդպիսով հասկացնելով, որ հարձակումը կարող է կապված լինել Իրանի կողմից Ռուսաստանին ենթադրյալ օգնության հետ։