Բրիթնի Սփիրսի ամուսինն արձագանքել է ամուսնալուծության մասին լուրերին

Բրիթնի Սփիրսի ամուսին Սեմ Ասգարին արձագանքել է ամուսնալուծության մասին լուրերին։ Այս մասին հայտնում է Mirror-ը։

Օրեր առաջ ԶԼՄ-ները հայտնել էին, որ Բրիթնի Սփիրսն ու Սեմ Ասգարին ամուսնալուծության եզրին են։ Բանն այն է, որ հարսանիքից ինը ամիս անց նորապսակները հանել են ամուսնական մատանիները։ Բացի այդ, վերջին շրջանում երգչուհին ամուսնու հետ լուսանկարներ չէր հրապարակում սոցցանցերում, այլ միայն կիսվում էր իր գործակալի և ընկերոջ՝ Քիթ Հադսոնի հետ արձակուրդի նկարներով։

Սփիրսը դեռևս չի մեկնաբանել ամուսնալուծության մասին լուրերը: Ասգարին իր հերթին մի քանի լուսանկար է հրապարակել, որոնցում հստակ երեւում է նշանադրության մատանին։ Մինչդեռ նրա մենեջեր Բրենդոն Քոհենը Entertainment Tonight-ին տված հարցազրույցում հերքել է աստղերի ամուսնության մեջ առկա տարաձայնությունները։ «Սեմը ընտանեկան խնդիրներ չունի։ Նա ուղղակի հանել էր մատանին, քանի որ նկարահանվում էր ֆիլմում»,- մեկնաբանել է նա։

Բրիթնի Սփիրսն ու Սեմ Ասգարին ամուսնացել են 2022 թվականի հունիսի 9-ին։ Նրանք ծանոթացել են 2016 թվականին, իսկ նշանվել՝ 2021 թվականի սեպտեմբերին։ 2022 թվականի ապրիլին երգչուհին հայտարարեց իր հղիության մասին, սակայն մեկ ամիս անց խոստովանեց, որ կորցրել է երեխային։