Սպորտը՝ առողջ ապրելակերպի աղբյուր. հայտնի են «ՀՀ վարչապետի գավաթի» թենիսի մրցաշարի հաղթողները

Չարենցավանի Արա Մանուկյանի անվան մանկապատանեկան մարզադպրոցում կայացավ «ՀՀ վարչապետի գավաթ» սեղանի թենիսի սիրողական մրցաշարի եզրափակիչ փուլը: Մրցումների երկրորդ օրը կայացան մրցաշարի կիսաեզրափակիչները և եզրափակիչները։  

«Արմենպրես»-ի թղթակցի հաղորդմամբ՝ «ՀՀ վարչապետի գավաթ» սեղանի թենիսի սիրողական մրցաշարի մարզային փուլին մասնակցել է 2070 մարդ։ Մասնակցության ամենաբարձր ցուցանիշը գրանցվել է Երևանում՝ 600 մասնակից, երկրորդ տեղում Գեղարքունիքի մարզն է՝ 235 մասնակից, իսկ երրորդ տեղում՝ Շիրակի մարզը՝ 205 մասնակից:

Մրցաշարին տարիքային երկու խմբերում 1-10-րդ տեղեր գրաված մասնակիցները ստացել են դրամական պարգևներ և ՀՀ ԿԳՄՍՆ համապատասխան կարգի հավաստագրեր, իսկ 1-ին, 2-րդ և 3-րդ տեղեր գրաված մասնակիցները (տղամարդիկ և կանայք) պարգևատրվել են նաև գավաթներով և մեդալներով:

1-ին տեղը զբաղեցրած մասնակիցները ստացել են 1 միլիոն ՀՀ դրամ, 2-րդ տեղը զբաղեցրածները՝ 500 հազար ՀՀ դրամ, 3-րդ հորիզոնականը զբաղեցրածները՝ 300 հազար ՀՀ դրամ։

4-րդ տեղը զբաղեցրածները ստացել են 100 հազար ՀՀ դրամ, 5-10-րդ տեղերը զբաղեցրածները` 50 հազար ՀՀ դրամ:

Կանանց 18-40 տարիքային խմբում հաղթել է Երևանի ներկայացուցիչ Աելիտա Ղազարյանը, երկրորդ տեղում է Հասմիկ Սիմոնյանը, եռյակը եզրափակել է Վերգինե Ղարիբյանը:

Տղամարդկանց այս տարիքային խմբում եռյակում են Գարիկ Չախոյանը, Էդուարդ Հակոբյանը, Նարեկ Գրիգորյանը:

Կանանց ավագ տարիքային խմբում առաջին երեք տեղերը զբաղեցրել են համապատասխանաբար Լիլիթ Գրիգորյանը, Սուսաննա Հովեյանը և Անահիտ Կրմզյանը, իսկ տղամարդկանց պայքարում՝ Արթուր Գրիգորյանը, Սարգիս Լալազարյանը, Կարեն Հարությունյանը:

Պարգևատրելով մասնակիցներին՝ ողջույի խոսքով նրանց դիմեց ՀՀ Վարչապետ Նիկոլ Փաշինյանը:

««ՀՀ վարչապետի գավաթ»-ի թենիսի սիրողական մրցաշարն արդեն երկրորդ տարին է, ինչ անցկացվում է, և մենք  այս մրցաշարը իրականացնում  ենք սպորտն ու ֆիզկուլտուրան զանգվածային դարձնելու համար: Իսկ գնված գույքը փոխանցվում է մարզային դպրոցներին, որպեսզի մարզաձևը զարգանա, առողջ ապրելակերպը զարգանա, մրցակցության ոգին զարգանա, հաղթանակի կամքը և նաև միասնականության ոգին զարգանա։ «ՀՀ վարչապետի գավաթ»-ը շարունակական բնույթ է կրելու: Հույս ունեմ, որ մասնակիցների թիվն ամեն տարի կավելանա: Կառավարության ծրագրի ռազմավարական կետերից մեկը սպորտին է վերաբերվում, և ամեն ինչ կանենք այն կյանքի կոչելու համար»,-ասաց վարչապետը:

ՀՀ ԿԳՄՍ նախարարի տեղակալ Կարեն Գիլոյանն ընդգծեց, որ գավաթի խաղարկության փուլերը շարունակական են լինելու և հույս հայտնեց, որ կգա մի օր, երբ մրցաշարը կունենա 10 հազարից ավել մասնակից:

«Ինչ վերաբերվում է սիրողական և  մասսայական սպորտին, ապա այսօր մենք կարծես թե ճիշտ ճանապարհով ենք ընթանում առաջ, որովհետև անցած տարվա համեմատ 500-ից ավելի մասնակից է միացել առաջնությանը։ Մարզերում ակտիվությունը նկատվում է, քանի որ  նախորդ տարի մրցաշարի համար ձեռք բերված նոր գույքը բաժանվել է մարզային մարզադպրոցներին, այս տարի ևս կբաժանվի, և այդ ամենը բերում է ցանկալի արդյունքի»,- ասաց Գիլոյանը։

ԿԳՄՍ  նախարարի տեղակալը ընդգծեց, որ պետք է անեն ամեն ինչ, որպեսզի սպորտը լինի մասսայական, ամենօրյա զբաղմունք  հասարակության համար։