«Այն, ինչ կատարվում է ՀՀ ներքաղաքական կյանքում, սովորական «թայֆաբազություն» է»

«Հայաստանում որպես այդպիսին, քաղաքականություն գոյություն չունի: Այն, ինչ կատարվել է մինչև հիմա և շարուանկվում է կատարվել սովորական «թայֆաբազություն» է»:

Այս մասին ԼՈՒՐԵՐ.com-ի հետ զրույցում ասում է քաղաքագետ Գարեգին Միսկարյանը՝ անդրադառնալով հայաստանյան ներկա ներքաղաքական իրավիճակին: Վերջինիս նշմամբ՝ չնայած սրան կան կառույցներ, որոնք որպես առանձին միավորներ քիչ կամ շատ քայլեր են անում ու հաջողություններ գրանցում, սակայն ասել, որ ՀՀ ներքաղաքական կյանքը քաղաքականապես լուծելու ուղղությամբ որևէ քայլեր են ձեռնարկվում` սխալ կհնչի:

«Ըստ իս՝ այն ուժերը, որոնք զբաղեցնում են հայաստանյան քաղաքական դաշտը, որևէ աղերս չունեն քաղաքական կոչվելու՝ նրանք պարզապես «թայֆայական» մտածելակերպով ընդհանուր շահեր ունեցող մարդկանց խումբ են, ոչ թե արժեքների վրա հիմված քաղաքական միավոր: Վերջերս ՄԻՊ ներկայացուցչի ընտրման ժամանակ էլ տեղի ունեցավ այն, ինչն արդեն նշեցի, այսինքն՝ այն, ինչ կատարվում է, որևէ կապ չունի պետականության հետ»,- համոզված է նա:

Քաղաքագետի համոզմամբ՝ չնայած հեշտ չէ կարգավորել ներքաղաքական կյանքը, սակայն կարելի է ձևավորել ու նորովի սկսել վարել այն:

«Դրա համար մեզ անհրաժեշտ են գաղափարական կուսակցություններ ու քաղաքական ուժեր, որոնց համար էլ պետք է ունենալ կայուն և ուժեղ քաղհասարակություն, քանի որ այդ պարագայում ինքն արդեն իսկ կձևավորվի վերոնշյալը: Մենք պետք է կրթենք մեր հասարակությանն անգամ ոչ ֆորմալ կրթական միջոցներով»,- նկատում է նա: