ԱՄՆ-ում 40 տարվա ազատազրկման են դատապարտել հայկական մաֆիայի նախկին պարագլխին

Լոս Անջելեսում հայկական մաֆիայի նախկին պարագլուխն ուրբաթ օրը դատապարտվել է 40 տարվա ազատազրկման՝  ավելի քան 1 մլրդ դոլար խարդախության սխեմայում ունեցած իր դերի համար, հաղորդում է ABC7-ը։

Լև Ասլան Դերմենը, որը նաև հայտնի է որպես Լևոն «Առյուծ» Թերմենջյան, մեղավոր է ճանաչվել Յուտայում «պոլիգամ» աղանդի (որը հայտնի է նաև որպես «Օրդեն») անդամների հետ դավադրության մեջ՝ պատմության ամենահամարձակ հարկային խարդախություններից մեկի համար:

Նա մեղավոր է ճանաչվել յոթ շաբաթ տևած դատավարությունից հետո՝փոստային խարդախություն կատարելու դավադրության, փողերի լվացման մեղադրանքով։    

Դերմանը Bel Air-ի միլիարդատեր է եղել և բենզալցակայանի սեփականատեր, երբ սկսել է աշխատել Քինգսթոնների կլանի անդամների հետ:

Ըստ ԱՄՆ արդարադատության նախարարության՝ Դերմենի 2020 թվականի դատավարության ժամանակ ձեռք բերված դատական ​​փաստաթղթերն ու վկայությունները ցույց են տալիս, որ 2010-ից 2018 թվականներին նա դավադրություն է կազմակերպել Քինգսթոնի կլանի տարբեր անդամների հետ՝ խաբեությամբ ավելի քան 1 միլիարդ դոլարի վերականգնվող վառելիքի հարկային արտոնություններ ստանալու համար:

ԱՄՆ հարկային վարչությունն ի վերջո վճարել է ավելի քան 511 միլիոն դոլարի վարկ Washakie Renewable Energy-ին՝ Յուտայի բիոդիզելային ընկերությանը, որը պատկանում է Ջեյքոբ եւ Եսայա Քինգսթոններին:     

Նշվում է, որ Քինգսթոնները խարդախությունից ստացված եկամուտը բաշխել են իրենց և Դերմենի միջև:

Ջեյքոբ Քինգսթոնը մեղադրական գործարք է կնքել եւ ցուցմունք տվել Դերմենի դեմ՝ երդվյալ ատենակալներին հայտնելով, որ իրենք ավելի շատ գումար ունեն, քան կարող էին լվանալ, ուստի նրանք սկսել են գնել շքեղության ապրանքներ, ինչպիսիք են Lamborghini եւ Bugatti, ինչպես նաեւ մասնավոր ինքնաթիռներ, զբոսանավեր եւ առանձնատներ Թուրքիայում, Յուտայում եւ Հանթինգթոն Բիչում։ Դատախազությունից հայտնել են, որ Դերմենը վարձել է կոռումպացված իրավապահ մարմինների աշխատակիցների թիմ, այդ թվում՝ ներքին անվտանգության նախարարության նախկին գործակալ Ֆելիքս Սիսներոսը, Գլենդելի նախկին հետախույզ Ջոն Բալիանը եւ ՀԴԲ նախկին գործակալ Բաբակ Բրումանդը:     

Բացի բանտարկությունից, Դերմենին պարտավորեցրել են վճարել IRS-ին (ԱՄՆ Հարկային վարչություն) $442,615,520 վնասի փոխհատուցում, ինչպես նաև ավելի քան $181 մլն դրամական տուգանք:

Ջեյքոբ Քինգսթոնը, ով Washakie-ի համասեփականատերն ու գործադիր տնօրենն էր, պարտավորվում է IRS-ին վճարել 511 միլիոն դոլարի փոխհատուցում: Դատարանը նրա դեմ վճիռ է կայացրել նաև 338 միլիոն դոլարի չափով դրամական փոխհատուցում վճարելու վերաբերյալ։ Նա նույնպես դատապարտվել է 18 տարվա ազատազրկման։