Թող Նիկոլ Փաշինյանը գաղտնազերծի ու հրապարակի իմ նամակը, եթե չհրապարակի՝ ստախոս է. Սարգսյան

«Ինչպե՞ս՝ իրենց գժի տեղ դնելով, կոպտորեն խախտելով արարողակարգի մասին ՀՀ օրենքը, բացահայտ և, իրենց կարծիքով, նաև ծածուկ հակառուսական տրամադրություններ առաջացնելով Հայաստանում, իր «կառուցողական գործընկերոջ» հետ սեպարատ բանակցություններ վարելով, մարտի 1-ի դեպքերի հետ հարուցված քրեական գործով անհիմն մեղադրանք առաջադրելով ՀԱՊԿ գլխավոր քարտուղար, գեներալ-գնդապետ Յուրի Խաչատուրովին»,- այս մասին դատարանի դիմաց լրագրողների հետ զրույցում ասաց ՀՀ երրորդ նախագահ Սերժ Սարգսյանը:

Անդրադառնալով վարչապետ Նիկոլ Փաշինյանի կողմից նախօրեին հնչեցրած այն հայտարարությանը, թե «հենց իրենց իշխանության օրոք է առաջին անգամ Ռուսաստանը Ադրբեջանի հետ բազմամիլիարդանոց զենքի գործարք արել» և որ ինքն այդ մասին տեղեկացել է «Սերժ Սարգսյանի կողմից գրված մի նամակից», ՀՀ երրորդ նախագահը պատասխանեց․

«Դժվար է ինձ մեկնաբանել, որովհետև եթե Հայաստանի կառավարիչը ԱԺ ամբիոնից փորձում է խոսել իմ կողմից ստորագրված գաղտնի գրիֆով նամակի մասին, էլ ի՞նչ ասեմ։ Միայն կարող եմ ասել հետևյալը, որ ես երբեք որևէ փաստաթուղթ՝ լինի դա նամակ, համաձայնագիր կամ որևէ այլ փաստաթուղթ, լինեն դրանք գաղտնի գրիֆով, թե սովորական, երբեք որևէ մի բան չեմ ստորագրել, որի համար որևէ հայ կարող է ամաչել։ Թող անհամեստ չհնչի, ընդհակառակը՝ բոլոր փաստաթղթերը եթե հրապարակեն, մարդիկ կտեսնեն, թե ինչպես է պաշտպանվել հայկական շահը, հայկական պետությունների շահը։

Ես պնդում եմ՝ թող հրապարակի, այդտեղ որևէ խնդիր չկա»,- ասաց նա։

Սարգսյանի խոսքով՝ Փաշինյանը կարող է  գաղտնազերծել և հրապարակել իր այդ նշած նամակը։

«Ես  պնդում եմ, թող հրապարակի։ Եթե չհրապարակի, ապա ինքը ստախոս է»,- հայտարարեց ՀՀ երրորդ նախագահը։