Բրիթնի Սփիրսի երկրպագուները անհանգստանում են նրա հոգեկան առողջության համար` տարօրինակ պարերի պատճառով

Բրիթնի Սփիրսի երկրպագուները մտահոգված են նրա հոգեկան առողջության համար՝ այն տարօրինակ պարերի պատճառով, որոնք երգչուհին պարբերաբար հրապարակում է իր սոցիալական ցանցերում։ Այս մասին հայտնում է Daily Mail-ը։

41-ամյա Բրիթնի Սփիրսն իր անձնական բլոգում տեսանյութ է հրապարակել, որում պարում է վառ դեղին տոպով, լողազգեստով և երկարաճիտ կաշվե կոշիկներով։ Վերջին կադրերում երգչուհին մի քանի անգամ հարվածում է իր  հետույքին ու միջնամատ ցույց տալիս տեսախցիկին։

Չնայած այն հանգամանքին, որ Բրիթնին անջատել է Instagram-ում իր հրապարակումների մեկնաբանությունները, աստղի երկրպագուները Twitter-ում խոսել են նրա տարօրինակ պարերի թեմայով։ «Կարծես Բրիթնի Սփիրսն իսկապես օգնության կարիք ունի», «Անկեղծորեն անհանգստացած եմ Բրիթնի Սփիրսի հոգեկան առողջության համար»,- գրել են օգտատերերը։

Ապրիլի սկզբին համացանցում լուրեր հայտնվեցին, որ 41-ամյա Բրիթնի Սփիրսի և 29-ամյա Սեմ Ասգարիի ամուսնությունը ծանր ժամանակներ է ապրում։ Նախ երգչուհին հանել էր ամուսնական մատանին և թռել Հավայան կղզիներ՝ հանգստանալու հին ընկերոջ և անձնական մենեջերի՝ Քեյդ Հադսոնի ընկերակցությամբ։ Աստղը կրակի վրա յուղ լցրեց, երբ իր անձնական բլոգում հրապարակեց տեսանյութ, որում Հադսոնի հետ պարում էր լողազգեստով։