Ռուստամ Բադասյանն անդրադարձել է Հայաստան ներմուծված շուրջ 1 տոննա կոկաինի հայտնաբերման դեպքին

Պետական եկամուտների կոմիտեի նախագահ Ռուստամ Բադասյանն անդրադարձել է Հայաստան ներմուծված շուրջ 1 տոննա կոկաինի հայտնաբերման դեպքին:

կառավարության նիստից հետո լրագրողների հետ զրույցում Բադասյանը հիշեցրեց, որ ԱԱԾ վարույթում կա քրեական գործ: Նա ձեռնպահ մնաց մանրամասների վերաբերյալ որևէ մեկնաբանություն տալուց:

« Եթե որևէ երկրից ապրանքը՝ ըստ ուղեկցող փաստաթղթերի, պետք է տեղափոխվի մեկ այլ երկիր՝ վերջնակետ, դա նշանակում է տարբեր բաներ: Տարբեր երկրների մաքսային մարմինները մշակում են ռիսկերի համակարգեր, ալգորիթմներ, որի հիման վրա պետք է վերհանեն, թե որ բեռանատարն են ստուգում: Բնականաբար, դրա մասին գիտեն նաև մաքսանենգ ճանապարհով այս կամ այն ապրանք տեղափոխող ընկերությունները և կիրառում են տարբեր մեխանիզմներ: Ինչպես մաքսային մարմինները մտածում են, թե ինչ ալգորիթմներ գրեն, որ առավել թիրախային հսկողություն իրականացնեն, այնպես էլ մաքսանենգերը մտածում են, թե ուղեկցող փաստաթղթերում ինչ տվյալներ նշեն, որ հնարավորինս խուսափեն: Այսինքն՝ եթե վերջնակետ նշվում է որևէ երկիր, այդ երկիր նաև բացի փաստաթղթում նշված ապրանքից կարող է տեղափոխվել թե մաքսանենգ ճանապարհով առկա ապրանք, կարող է նաև ճանապարհին կորել այդ ապրանքը»,-ասաց Բադասյանը:

Անդրադառնալով հարցին, թե ինչպես է հաջողվել 1 տոննա կոկաին բերել Հայաստան՝ նա ասաց, որ ամբողջ աշխարհը ողողված է թմրանյութերով, և բնականաբար, այդ թմրանյութերը հայտնվում են տարբեր շուկաներում մաքսանենգ ճանապարհով՝ անցնելով մաքսային հսկողության կետեր կամ շրջանցելով մաքսային հսկողության գոտիները: Անպայման չէ, որ մաքսային հսկողության գոտիով մտնի մաքսանենգ ապրանքը:

Անդրադառնալով այլ ճանապարհներով մուտք գործելու հնարավորությանը՝ Բադասյանն օրինակ բերեց Իրանի հետ ՀՀ սահմանի դեպքերը: «Դեպքերի մեծամասնությունը ռուս սահմանապահների կողմից է հայտնաբերվում, որովհետև թմրանյութն, օրինակ, նետում են գետի վրայով կամ դրոնով տեղափոխում են և թողնում այնպիսի տեղում, որտեղից իրենց հանցակիցներն այստեղ կարող են վերցնել»,-նշեց ՊԵԿ նախագահը:

Բադասյանը շահարկումներ համարեց հնչող մեղադրանքները, թե առանց իշխանության հովանավորչության կամ իմացության այդ ամենը տեղի չէր ունենա:

«Այսօր ամբողջ աշխարհում թմրանյութերի դեմ պայքարը մարտահրավեր է: Ամենացավալին այն է, որ Հայաստանում հայտնվում են արդեն այնպիսի թմրանյութեր, որոնք խիստ մահաբեր են: Եվ այդ հայտնաբերումների հետ կապված պետք է մտածենք, թե մեր կարողություններն ինչպես ենք զարգացնում: Աշխարհն էլ է իր կարողությունը զարգացնում»,-նշեց Բադասյանը:

ՊԵԿ նախագահը վստահեցրեց, որ ունեն սքաներներ, շներ, օպերատիվ ինֆորմացիա ևս ունենում են: Որ դեպքում հայտնաբերում են, և, եթե կարելի է հանրայնացնել, հանրայնացնում են:

«Հայաստանը հաճախ հենց որպես տրանզիտային երկիր է դիտարկվում: Նաև եղել են դեպքեր, երբ Հայաստանի, Վրաստանի, Ուկրաինայի և մի շարք այլ երկրների մաքսային մարմինների մասնակցությամբ վերահսկելի մատակարարում ու գնում է եղել, և պարզվել է, որ Հայաստանի և Վրաստանի միջոցով ապրանքը տրանզիտ տեղափոխվել, հասել է Կիև: Եվ Կիևում եղավ այս հանցավոր խմբի բացահայտումը»,-ասաց Բադասյանը: