Սևանը շուտով կրկին սպասելու է կիթառով պոետներին

«Հուսո առագաստ 2023» հեղինակային երգի միջազգային փառատոնն այս տարի ևս, արդեն 8-րդ անգամ, իր հարկի տակ կհյուրընկալի հեղինակային երգի տարբեր սերունդների ներկայացուցիչներին ու ժանրի հավատարիմ երկրպագուներին։

 Այժմ ընթացքի մեջ է փառատոնի նախընտրական փուլը, որը կտևի մինչև հունիսի 20-ը և որին մասնակցելու համար պետք է ներկայացնել հայտադիմում։ Դիմել կարող են ինչպես հեղինակ-կատարողները, այնպես էլ այլ հեղինակների ստեղծագործությունները սեփական մեկնաբանությամբ կատարող անձինք։

 Այս փուլը հաջողությամբ հաղթահարած կատարողները հունիսի 30-ին կմասնակցեն ընտրական փուլին, որը տեղի կունենա «Մետրո» թատրոնում: Այստեղ՝  համերգի ընթացքում ժյուրիի անդամները կընտրեն լավագույններին: Նրանք հնարավորություն կստանան մասնակցել փառատոնի եզրափակիչ փուլին։   Այս տարի ևս մասնակիցների կեցության և սննդի հարցերը հոգում են փառատոնի կազմակերպիչները:

«Հուսո առագաստ»-ի սևանյան նավարկությունն այս տարի տեղի կունենա հուլիսի 20-23-ը Գեղարքունիքի մարզի Շորժա գյուղին հարակից «WishUp» հանգստյան գոտում։ Փատատոնային 3 համերգների ընթացքում ունկնդիրը հնարավորություն կունենա լսելու ընտրական փուլը հաղթահարած կատարողների լավագույն տասնյակին, արտերկրից ժամանած երգահաններին և իհարկե բոլոր սերունդների հայ հանրաճանաչ հեղինակ-կատարողներին։

Փառատոնը, հավատարիմ մնալով իր առաքելությանը, նպատակ ունի ոչ միայն հայտնաբերել շնորհալի հեղինակ-կատարողների, այլև կապուտակ Սևանի ափին կրկին ստեղծել մշակութային այն եզակի միջավայրը,  որը 3 օր անընդմեջ կվայելեն թե՛ տարբեր սերունդների ու ազգերի երգահանները, և թե՛ հեղինակային երգի սիրահարները։ Այս տարի ևս փառատոնային օրերը հարուստ են լինելու վարպետաց դասերով, արդյունավետ քննարկումներով ու անկեղծ շփումներով։

«Հուսո առագաստ-2023» հեղինակային երգի միջազգային փառատոնն իրականացվում է  «Սիվիլ արտ» մշակութային հասարակական կազմակերպության և «Բարդերիակումբ»-ի նախաձեռնությամբ՝ ՀՀ Կրթության, գիտության, մշակույթի և սպորտի նախարարության աջակցությամբ։ Փառատոնի, հայտադիմումների լրացման ընթացակարգի և հետագայում մասնակցելու մասին ավելի մանրամասն կարող եք տեղեկանալ՝ այցելելով  BARD FEST ARMENIA ֆեսբուքյան էջ: