Իրանը ներկայացրել է իր առաջին «Ֆաթթահ» հիպերձայնային բալիստիկ հրթիռը

Իրանի իշխանություններն այսօր՝ հունիսի 6-ին, ցուցադրել են «Ֆաթթահ» հիպերձայնային բալիստիկ հրթիռը՝ իրանական արտադրության առաջին նմանատիպ զենքը, հայտնում է Tasneem-ը։

Իրանի նախագահ Իբրահիմ Ռաիսին, Իսլամական հեղափոխության պահապանների կորպուսի (ԻՀՊԿ) հրամանատար, գեներալ-մայոր Հոսեյն Սալամին և ԻՀՊԿ-ի օդատիեզերական ուժերի հրամանատար, բրիգադային գեներալ Ամիր Ալի Հաջիզադեն Թեհրանում մասնակցել են հրթիռի արձակման արարողությանը:

Միջոցառումների ժամանակ Հաջիզադեն ասել է, որ այս կերպ Իրանը դարձել է հիպերձայնային տեխնոլոգիաներով զինված աշխարհում չորրորդ երկիրը։

Հրթիռի անվանումը՝ «Հաղթող», ընտրել է Իրանի Իսլամական Հանրապետության ղեկավար այաթոլլա Ալի Խամենեին։

Հրթիռը Իսլամական հեղափոխության պահապանների կորպուսի օդատիեզերական ուժերի մշակումն է։ Նրա հեռահարությունը 1,4 հազար կմ է։ Հրթիռը կկարողանա զարգացնել մինչև 15 900 կմ/ժ արագություն, ունակ է հաղթահարելու թշնամու հակահրթիռային պաշտպանությունը, մանևրել Երկրի մթնոլորտում և նրանից դուրս: