Ինքնաթիռի հարբած ուղևորը կծել է ոստիկանի ոտքից (տեսանյութ)

Southwest Airlines ավիաընկերության հարբած ուղևորը ծեծկռտուք է սարքել ինքնաթիռում, կծել ոստիկանի ոտքից և դատարանի առաջ կանգնել խուլիգանության համար։ Այս մասին հայտնում է UNILAD-ը։

Նշվում է, որ 25-ամյա Կամարին Գիբսոնը սկսել է ագրեսիվ վարքագիծ դրսևորել դեռևս Նյու Օռլեանի օդանավակայանում՝ ինքնաթիռի թռիչքից առաջ։ Բորտուղեկցորդուհիներին չի հաջողվել հանգստացնել կնոջը, և այդ պատճառով ինքնաթիռ են հրավիրվել ոստիկաններ։ Չնայած սպայի հանգիստ խնդրանքին՝ լքել ինքնաթիռը, Գիբսոնը համառել է և կծել նրա ոտքից։

Ականատեսները պատմում են, որ կինը շարունակել է կռվել ոստիկանների հետ, մինչ որ նրանք նրան դուրս են բերել սրահից։ Արդյունքում, իրավապահները ստիպված են եղել կապել ուղևորուհուն և նստեցնել անվասայլակին, որով էլ նրան հեռացրել են ինքնաթիռից։ Նրան տեղափոխել են ուղղիչ կենտրոն, որտեղ նրան մեղադրանք է առաջադրվել հասարակական կարգը խախտելու և մանր խուլիգանության համար։