Փղերը փրկել են ընձառյուծին քաղցած առյուծներից (տեսանյութ)

Հարավաֆրիկյան Հանրապետությունում փղերը փրկել են ընձառյուծին երկու սոված առյուծներից, որոնք բարձրացել էին ծառի վրա և փորձել խլել նրա որսը։ Միջադեպի տեսանյութը հրապարակվել է YouTube-ի Latest Sightings ալիքում։

Տեսանյութը համացանցում տեղադրել է Սաբի Սանդ արգելոցի գլխավոր էքսկուրսավարը՝ Մամմես անունով: «Մենք հետևում էինք վագրակատվի հետքերին և ռադիոյով հաղորդագրություն լսեցինք արու ընձառյուծի հայտնվելու մասին: Մենք անմիջապես փոխեցինք ուղին և շարժվեցինք նրա ուղղությամբ»,- ասել է էքսկուրսավարը։ Շրջայցի մասնակիցները նկատել են նույն ուղղությամբ շարժվող երկու առյուծների։ Էգ առյուծները հաճախ են օգտվում այլ գիշատիչներից որսը խլելու հնարավորությունից, բացատրել է էքսկուրսավարը:

«Երբ տեղ հասանք, առյուծներն արդեն այնտեղ էին։ Նրանցից մեկն արագ բարձրացավ ծառի վրա և ստիպեց ընձառյուծին գցել իմպալան: Երկրորդը հափշտակեց լքված որսը և վազեց, իսկ առաջինը սկսեց հարձակվել ընձառյուծի վրա», - ասել է Մամմես: Այդ պահին թփերի միջից փղեր դուրս եկան՝ ակնհայտորեն դժգոհ լինելով աղմուկից։ Փղերը թույլ չտվեցին գիշատիչներին որսը վերցնել ընձառյուծից։ Ծառի վրա նստած առյուծը շտապ անհետացավ։

Փղերը սկսեցին հետապնդել նրան, ինչը ընձառյուծին հնարավորություն տվեց հեռանալ բախումների վայրից։ «Նա նույնպես ցած ցատկեց ծառից և փախավ՝ մեզ ապշած թողնելով կատարվածից», - ասել է Մամեսը:

Նա նշել է, որ փղերը երբեմն քշում են առյուծներին, երբ վտանգ են զգում։