«Քոչարյանն ու Հեյդար Ալիևը վրանի տակ քննարկել են Մեղրիի փոխանակման հարցը»

ՀՀ վարչապետ Նիկոլ Փաշինյանը հայտարարեց՝ Վաղարշակ Հարությունյանը, ով 1999-ին եղել է Պաշտպանության նախարար, ասել է, որ  Ռոբերտ Քոչարյանը և Հեյդար Ալիևը 1999 թվականի հուլիսին Սադարակում իր ներկայությամբ քննարկել են Մեղրիի փոխանակման տարբերակը:

Փաշինյանն այս մասին ասաց ՀՀ ազգային ժողովի 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով քննիչ հանձնաժողովի նիստում՝ անդրադառնալով ՔՊ խմբակցության պատգամավոր Քրիստինե Պողոսյանի հարցին՝ Ռոբերտ Քոչարյանի և Հեյդարի Ալիևի հանդիպման վերաբերյալ: 

«Քննարկմանը ներկա մարդիկ են եղել, մասնավորապես Պաշտպանության նախարար Վաղարշակ Հարությունյանը: Նա հրապարակային հարցազրույցում ասել է, որ Մեղրիի տարբերակն իր ներկայությամբ քննարկվել է Ռոբերտ Քոչարյանի և Հեյդար Ալիևի միջև 1999 թվականի հուլիսին՝ Սադարակում: Հարությունյանը նաև հայտարարել է, որ Քոչարյանն իրեն ասել է, որ «Մեղրիի տարբերակը» լավ տարբերակ է Ղարաբաղյան հակամարտության լուծման համար: Ըստ նրա՝ այդ ժամանակ «Մեղրիի տարբերակը» եղել է հետևյալը՝  Հայաստանին է միացվում նախկին ԼՂԻՄ տարածքը և Լաչինը՝ որպես ՀՀ և Արցախի միջև միջանցք, փոխարենը Հայաստանն Ադրբեջանին էր զիջում Մեղրիի շրջանը 1988 թ սահմաններով, որ Ադրբեջանը ցամաքային կապ ձեռք բերեր Նախիջևանի հետ: Սակայն այդպիսով Հայաստանը կորցնում էր իր ցամաքային կապն Իրանի հետ»,-մեջբերեց Փաշինյանը:

Նա հավելեց՝ այդ վկայությունները կան:

Վարչապետը մեջբերեց նաև «Առավոտ» օրաթերթի 2000թ-ի հրապարակումն այն մասին, որ այն ժամանակ ԱԳ նախարար Վարդան Օսկանյանը 2000թ ապրիլի 25-ին Գլենդելի հայ համայնքի հետ հանդիպման ընթացքում ոչ պաշտոնական ելույթի ժամանակ հայտարարել է հետևյալ տարբերակի մասին՝ Մեղրին տրվում է Ադրբեջանին, Լաչինը Ղարաբաղի հետ տրվում է Հայաստանին, Մեղրիով Հայաստանին տրվում է մի սուվերեն ճանապարհ, որով Հայաստանը կարող է սուվերեն հաղորդակցության մեջ մտնել Իրանի հետ: