Զոհեր ունենալը կապված է ոչ թե մոբիլության հետ, այլ՝ կարգապահության և քողարկման․ Սեյրան Օհանյան

«Եթե քննիչ հանձնաժողովում պաշտոնատար անձանցից մեկին արտոնություն է տրվում` դա նշանակում է, որ այդ քննիչ հանձնաժողովը այդ անձի նկատմամբ ունի վերապահումներ և այդ անձը իր կատարած բոլոր սխալները փորձելու է դնել ուրիշների վրա»,-այս մասին ԼՈՒՐԵՐ.com-ի հետ զրույցում հայտնեց «Հայաստան» խմբակցության ղեկավար Սեյրան Օհանյանը` անդրադառնալով այսօր ԱԺ-ում 44-օրյա պատերազմի հանգամանքները քննող քննիչ հանձնաժողովում Նիկոլ Փաշինյանի այն հայտարարությանը, թե շատերը զոհվեցին ոչ թե մարտի մեջ, այլ տեղաշարժվելիս, քանի որ բանակը մոբիլության լրջագույն խնդիր ուներ։

«Իհարկե, բանակը միշտ էլ մոբիլության կարիք է ունեցել, բայց, վերջին տարիներին, մենք ՌԴ-ից ստացել ենք միջպետական վարկ՝ 200 մլն և 220 մլն էլ ավելացրել ենք, և 2015-2017թթ բավականին մեծ քանակությամբ տրանսպորտային և շարժական տարբեր մեքենաներ ենք ձեռք բերել, համալրել բանակը, իսկ զոհեր ունենալը կապված է ոչ թե մոբիլության հետ, այլ կարգապահության և քողարկման, եթե այդ մեքենաներից դուրս գային և ոտքով շարժվեին՝ ոչ մի բան չէր լինի»,-ասաց Սեյրան Օհանյանը և նշեց, որ այն սպառազինությունը, որը եղել է հայկական զինված ուժերում, մշտապես օգտագործել են ինքնուրույն և չի եղել որևէ զինատեսակ, որի օգտագործման համար պետք է այլ երկրից թույլտվություն ստանային։

«Այդտեղ էլ Փաշինյանը ստում է․ միգուցե իր ժամանակ գնացել է ինչ-որ մեկի կոշիկներն է սկսել լիզել և դրանից է այդպես ստացվել, բայց մեր ժամանակ այդպիսի բան չի եղել։

Միջազգային երաշխիքները դա ամբողջ բանակցային գործնթացն է, Փաշինյանը այդ փաթեթը ամբողջությամբ ոտնահարել է։ Երկրի նախկին ղեկավարներից չի հարցրել, թե մենք ինչ կետում ենք կանգնել, ինչից սկսել, ինչ խորհուրդ կտան։ Իր ղեկավարման կետից է սկսել և դրանով իսկ հրահրել պատերազմ»,-նշեց նա։

Մեր զրուցակիցը այն կարծիքը հայտնեց, որ վարչապետը, պատգամավորները, կառավարության շատ անդամներ և այլ անձինք, գնացել են Արցախ կամ տարբեր հատվածներ, սակայն այդ այցերը ձևական բնույթ են կրել, ոչ մի արդյունք չեն տվել։

«Մենք ունենք մի համակարգ, որի մասին քիչ ենք խոսում․ դա դատաիրավական համակարգն է։ Իրենք պատերազմի ժամանակ պետք է շարունակեին օրինականություն, կարգ ու կանոն հաստատելու իրենց գործողությունները, սակայն, մատը մատին չեն տվել, բայց պատերազմի հետևանքները դեռ չքննած` ԱԱԾ-ն, ոստիկանությունը տարբեր գեներալական պաշտոններին հավասար կոչումներ են ստացել և պագևատրվել»,-եզրափակեց նա։