Որևէ լավ բան չեմ ակնկալում․ Ռուբեն Մելիքյանը՝ ՀՀ ՄԻՊ-ի՝ ադրբեջանցի գործընկերոջը արած համագործակցության մասին

«Ես շատ հստակ և կտրուկ կարձագանքեմ այս դիրքորոշմանը։ Իմ անձնական մոտեցումն այն է, որ առանց Արցախի Հանրապետության մարդու իրավունքների պաշտպանի ներգրավման, նման որոշումները համարում եմ ոչ ճիշտ և արդյունավետ»,-այս մասին ԼՈՒՐԵՐ.com-ի հետ զրույցում տեսակետ հայտնեց Արցախի Հանրապետության նախկին ՄԻՊ, իրավապաշտպան Ռուբեն Մելիքյանը` անդրադառնալով Հայաստանի մարդու իրավունքների պաշտպան Անահիտ Մանասյանի՝ ադրբեջանցի գործընկերոջը արած համագործակցության առաջարկին։

Խոսքն այն մասին է, որ Անահիտ Մանասյանը պաշտոնական գրություն է ուղարկել Ադրբեջանի մարդու իրավունքների պաշտպանին՝ լրագրողների հետ զրույցում հայտարարելով, որ մարդու իրավունքների պաշտպանությամբ զբաղվող հաստատությունները չեն զբաղվում քաղաքական, տարածքային հարցերով, անկախ հաստատություններ են, և իր խոսքով՝ մեր երկու պետությունների` նման ապաքաղաքական հաստատությունները պետք է ունենան պատշաճ հաղորդակցություն և կարողանան լուծել առաջացող հումանիտար և մարդու իրավունքների հետ կապված խնդիրները։

«Իմ ընդհանուր մոտեցումն այն է, որ Հայաստանի իշխանությունները, իրենց ամբողջ ծավալով, առանց որևէ բացառության, ադրբեջանական իշխանություններ են, իսկ Անահիտ Մանասյանը, լինելով ՔՊ-ի թեկնածու, նույնպես համարվում է պրո-ադրբեջանական գործիչ, այս տեսանկյունից, ես որևէ լավ բան չեմ ակնկալում»,-ասաց Ռուբեն Մելիքյանը։

Մելիքյանի խոսքով` ինչպես Անահիտ Մանասյանն է հանդիսանում միմիայն ՔՊ-ի կողմից նշանակված մարդու իրավունքների պաշտպան, նույն կերպ էլ Ադրբեջանի իրավունքների պաշտպանն է բացառապես Ալիևի կողմից նշանակված.

«Իմ կարծիքով՝ այս գործնթացը, շատ հնարավոր է, որ արտգործնախարարների բանակցությունների շրջանակներում է ծնվել և այդ տեսանկյունից` կարող է ինչ-որ որոշումներ են ուզում անցկացնել` դրան տալով ոչ քաղաքական լինելու շղարշ»,-եզրափակեց նա։