Բաշկիրիայում մեղուները 465 անգամ խայթել են երկու երեխայի

Բաշկիրիայում մեղուների պարսը հարձակվել է երկու տղաների վրա, բժիշկները հանել են մեղվի 465 խայթոց, գրում է Ռիա Նովոստին։

Միջադեպը տեղի է ունեցել Իշիմբայի շրջանի Ախմերովո գյուղում։ Երկու եղբայրներն, առանց ծնողների ուղեկցության, գնացել են անտառի բացատ։ Այնտեղ նրանց վրա մեղուները հարձակվել են, երեխաները բազմաթիվ խայթոցներ են ստացել։ Ութ տարեկան կրտսեր եղբորը հաջողվել է փախչել և հասնել տուն, որտեղ նա պատմել է, որ ավագ եղբայրը մնացել է անտառում և չի կարողանում ինքնուրույն դուրս գալ։ Հայրն ու հորեղբայրը գնացել են բացատ, ցրել մեղուներին ու երեխային ազատել։

«Տղաներին տեղափոխել են գյուղի բժշկական կենտրոն, որտեղ նրանց ցուցաբերվել է առաջին բուժօգնություն։ Ավելի ուշ վերակենդանացման բաժանմունքում մոտ 465 խայթոց է հեռացվել մարմնի բաց մասերից՝ վերջույթներից, ձեռքերից, ոտքերից, դեմքից, ականջներից և գլխի մաշկից»,- ասվում է հրապարակման մեջ։

Բաշկիրիայի առողջապահության նախարարությունը պարզաբանել է, որ երեխաներն արդեն դուրս են գրվել հիվանդանոցից։ Բաժանում ավելացրել են, որ երկու տղաների վիճակը կայուն է, այտուցը նվազում է։