«Միջազգային հանրությունը հաշվի կառնի՞ Փաշինյանի կոչը՝ օգնել Արցախի ժողովրդին»

«Խաղաղության օրակարգը, որը իշխանությունները հնչեցնում են, բազմիցս տապալվել է, սեպտեմբերյան ագրեսիայից հետո թվում էր, որ ամբողջովին տապալված է, որ իրենք էլ չեն խոսելու դրա մասին, բայց տեսնում ենք, որ դեռ շարունակում են խոսել։

Այն օրերին, երբ Ադրբեջանը հայ զինծառայող է սպանում, բլոկադայի է ենթարկում Արցախը, իրենք ասում են` մենք խաղաղության օրակարգով ենք շարժվում»,-այս մասին ԼՈՒՐԵՐ.com-ի հետ զրույցում տեսակետ հայտնեց կովկասագետ Կարեն Իգիթյանը` անդրադառնալով Հայաստանի Հանրապետության վարչապետ Նիկոլ Փաշինյանի՝ թվիթերյան էջում օրերս հնչեցրած կոչին, որը ուղղված էր միջազգային հանրությանը՝ գործնական քայլեր ձեռնարկել Լեռնային Ղարաբաղի ժողովրդի իրավունքների և անվտանգության ապահովման համար:

«Միջազգային հանրությունը, իհարկե, հնարավորություն ունի օգնելու, բայց ունի՞ նա ցանկություն՝ դա հարց է։ Այսպիսի քաղաքական մանկամտություն կա տարածված սովետական երկրներում, որ կա ինչ-որ միջազգային հանրություն, որը կգնա, կխառնվի այլ երկրի հարցերին, որովհետև դա լավ կլինի մարդկանց համար, դա այդպես չի աշխատում, ցավոք սրտի, դա աշխատում է լրիվ ուրիշ ձևով։ Միջազգային հանրություն կոչված երկրները կխառնվեն այն դեպքում, երբ կունենան կոնկրետ շահ։

Այժմ, եթե միջազգային հանրության շահը չի համնկնում Արցախի ժողովրդի շահի հետ՝ իրենք ուղղակի կոչեր են անելու։ Եթե Ադրբեջանը թեկուզ ոչ մի բան չաներ, բայց միջազգային հանրությանը պետք լիներ մտնել այդ տարածաշրջան և իշխանություն հաստատել հողի վրա, ապա յուրաքանչյուր առիթ կօգտագործեր դրան հասնելու համար և բլոկադայի հարցը չէր լինի»,-ասաց Կարեն Իգիթյանը։

Մեր զրուցակիցը այն կարծիքը հայտնեց, որ խաղաղությունը շատ լավ բան է, բայց եթե մի կողմը շատ ավելի ուժեղ է, իսկ մյուսը՝ թույլ, ապա ուժեղ կողմը ուղղակի չի ուզելու այդ խաղաղությունը։

«Սա պատմական այն պահն է, որ Ադրբեջանը կարող է ընդհանրապես ոչնչացնել Հայաստանը․ իրենք են այդպես մտածում, ասում են` «Եթե մենք այս պահից չօգտվենք, ապա ե՞րբ ենք օգտվելու», իսկ Հայաստանի իշխանությունները չեն ուժեղացնում, զինում բանակը և ասում են՝ մենք թույլ ենք, պետք է զիջենք, բայց պետք է մի բան ֆիքսենք, որ ՀՀ-ի պատմության մեջ սա առաջին անգամն է, որ որևէ կառավարություն չի կարողանում զինել բանակը, մենք երբեք նման խնդիր չենք ունեցել»,-եզրափակեց նա։