«Դատավորները Եվրոպական դատարանում շահելու են. խախտվում են իրավական կարևոր սկզբունքները»

«Դատավորները Եվրոպական դատարանում շահելու են, ես դրանում կասկած չունեմ»,- այս մասին ԼՈՒՐԵՐ.com-ի հետ զրույցում տեսակետ հայտնեց փաստաբան Արա Ղազարյանը` անդրադառնալով Երևան քաղաքի առաջին ատյանի ընդհանուր իրավասության քրեական դատարանի դատավոր Դավիթ Հարությունյանին կարգապահական  պատասխանատվության ենթարկելու վերաբերյալ  ԲԴԽ-ի որոշումանը։

Մասնավորապես, ԲԴԽ-ն դադարեցրեց Դավիթ Հարությունյանի լիազորությունները։
«Իրավական բոլոր կարևոր սկզբունքները խախտվում են։ Այս ամենի նպատակը կարող է լինել այն, որ Դավիթ Հարությունյանը չաշխատի, իսկ ընդհանուր առմամբ անհասկանալի է թե ինչու են ուզում մեծ թվով դատավորներից ազատվել, երբ նրանք բարձր որակավորում ունեն»,- ասաց մեր զրուցակիցը։

Նրա խոսքով` եթե ուզում են սերնդափոխություն լինի, սերնդափոխությունը ինքնին լինում է.
«Դատավորների կազմը վերջին տաս տարվա մեջ փոխվել է սերնդափոխության արդյունքում, ոչ  թե կարգապահական վարույթների, այնպես որ անհասկանալի է թե ինչ են ուզում իրենք. որևէ  ռացիոնալ հիմք, նպատակ ես չեմ տեսնում»,- ասաց Ղազարյանը։

«Դատական համակարգին այս ամենը բնականաբար լավ բանի չի բերելու, դատական իշխանության  անկախության վրա  լրջորեն ազդում է սա»,- ասաց Ղազարյանը և հավելեց, որ այս ամենը քաղաքական ծրագիր է, ինչը որևէ կապ չունի իրավական գործընթացների հետ։