«Ադրբեջանում հայ զինծառայողների դատավարությունը քաղաքական պատվերով նախաձեռնված և հրահրված պրոցես է»

«Այս դատավարությունը քաղաքական պատվերով նախաձեռնված, հրահրված դատական պրոցես է, որը Ադրբեջանի արդարադատության համակարգի պայմաններում չի կարող հանգեցնել արդար վճռի կայացման»,- այս մասին ԼՈՒՐԵՐ.com-ի հետ զրույցում տեսակետ հայտնեց իրավաբան Սիրանուշ Սահակյանը` անդրադառնալով Սումգայիթում տեղի ունեցող գերեվարված 2 հայ զինծառայողների` Հարություն Հովակիմյանի և Կարեն Ղազարյանի գործով առաջին դատական նիստին։

«Մենք գործ ունենք բեմականացված դատավարությունների հետ, որտեղ մեր զինծառայողների իրավունքները կոպտագույն կերպով խախտվում են։ Այնպիսի առանցքային երաշխիքներից են մարդիկ զրկված, ինչպիսին արդար, անկախ դատարանի կողմից գործի քննությունն է կամ պաշտպանության իրավունքի իրացումը»,-ասաց իրավաբանը և հավելեց, որ զինծառայողները առևանգվել են ռազմագերիների փոխանակման գործընթացում Ադրբեջանի բանակցային ուժը վերափոխելու նպատակով։

Նրա խոսքով` շատ կարևոր է նախ փաստահավաք աշխատանքը, որպեսզի միջազգային և հայկական  հասարակական կազմակերպությունները իրենց ուշադրության կենտրոնում պահեն դատավարությունը, վեր հանեն խնդիրները և դրանց վերաբերյալ տեղեկացնեն միջազգային կառույցներին.
«Միջազգային  իրավապաշտպան կառույցների արձագանքն է խիստ կարևոր, որն էլ նախադրյալ կհանդիսանա որպեսզի միջազգային քաղաքական կազմակերպությունները ներգրավեն և կանխեն որոշ գործընթացներ, այստեղ կարծում եմ գործընկեր երկրները ինչպիսիք` Եվրոպական միությունն է, Եվրոպայի խորհուրդը, մարդու իրավունքներով զբաղվող կառույցներն են, մեծ դերակատարում ունեն և պետք է պատշաճ արձագանքնեն ադրբեջանական ապօրինություններին», - նշեց Սահակյանը։