Ֆրանսիայում անկարգությունների հինգերորդ գիշերը հարյուրավոր նոր ձերբակալություններ են եղել (լուսանկարներ, տեսանյութ)

Ֆրանսիայի Նանտեր քաղաքում ոստիկանի կողմից դեռահասի սպանությունից հետո սկսված զանգվածային անկարգությունների հինգերորդ գիշերը հարյուրավոր նոր ձերբակալություններ են տեղի ունեցել։ Միաժամանակ, նշվում է, որ իրադարձությունների ինտենսիվությունը որոշակիորեն նվազել է։ Թերևս դա պայմանավորված է ամբողջ երկրում լրացուցիչ իրավապահ ուժերի տեղակայմամբ՝ ընդհանուր առմամբ ավելի քան 45 հազար աշխատակից, գրում են միջազգային ԶԼՄ-ները։

Փարիզի արվարձանում զոհվածին հուղարկավորելու հաջորդ օրը երկրի ներքին գործերի նախարարությունը հայտնել է, որ կիրակի գիշերը ավելի քան 700 մարդ է բերման ենթարկվել։ Անկարգությունների և բախումների ընթացքում վիրավորվել է առնվազն 45 ոստիկան և ժանդարմերիայի սպա, այրվել է ավելի քան 570 ավտոմեքենա և ավելի քան 70 շենք։ Մոտ 870 այլ հրդեհներ գրանցվել են փողոցներում և հասարակական վայրերում։

Նախորդ գիշեր ոստիկանություն են բերվել 1300 խռովարարներ։ Հինգ օրվա ընթացքում ձերբակալվածների ընդհանուր թիվը գերազանցում է 3000-ը։

Բողոքողները հիմնականում երիտասարդներն են։ Ոստիկանությունը նրանց մեղադրում է բռնության և ռասիզմի մեջ։ 

Ֆրանսիայի նախագահ Էմանուել Մակրոնը սպանությունն անվանել է «անբացատրելի և աններելի»: Նա կոչ է արել դադարեցնել բռնությունները և ցուցաբերել հանգստություն, «որպեսզի արդարությունը հաղթի»։ Անկարգությունների հետ կապված՝ Մակրոնը հետաձգել է այցը Գերմանիա, որը պետք է մեկնարկեր հուլիսի 2-ին։