Սա ծաղր է․ դատաիրավական համակարգում ունենք միայն աննախադեպ հետընթաց. Ռուբեն Մելիքյանը՝ Փաշինյանին

ՀՀ վարչապետ Նիկոլ Փաշինյանն այսօր՝ հուլիսի հինգին, ՀՀ Սահմանադրության օրվա առթիվ իր ուղերձում հայտարարել է՝ դատաիրավական համակարգում ունենք էական առաջընթաց, որն արտահայտվում է հետևյալով. այսօր որևէ անմեղ մարդ չի կարող մեղադրական վճռի արժանանալ, անհարկի ձերբակալվել կամ կալանավորվել: Այսօր որևէ մեկն իրեն չի կարող համարել օրենքից վեր: Բոլոր մարդիկ իրապես հավասար են օրենքի առջև:

Արցախի Հանրապետության նախկին ՄԻՊ, իրավապաշտպան Ռուբեն Մելիքյանը ԼՈՒՐԵՐ.com-ի հետ զրույցում Փաշինյանի այս հայտարարությունը ծաղր որակեց՝ նշելով, որ ընդհակառակը, դատաիրավական համակարգում ունենք աննախադեպ խայտառակ հետընթաց։

Մելիքյանի խոսքով` Հայաստանում հնարավոր է լինել անմեղ անձ և հայտնվել ճաղերի հետևում, ընդ որում՝ ոչ միայն քաղաքական պատճառներով, այլև՝ ցանկացած պատճառով։  

«Քաղբանտարկյալ Արմեն Աշոտյանը վերջին օրինակն է, բայց, իհարկե, քաղբանտարկյալների թիվը ավելի շատ է։ Անազատության մեջ հայտնվելը միայն քաղաքական գործիչներին կամ միայն ռեժիմի հակառակորդներին չի վերաբերում, վերաբերում է ցանկացածին և դրա վառ արտահայտությունն այն է, որ հեղինակություն ունեցող դատավորներին ապօրինաբար, խայտառակ ձևերով ազատում են, այսինքն, այն մարդիկ, ովքեր տարիներ շարունակ երաշխիք են հանդիսացել տարբեր անձանց իրավունքների ոտնահարման դեմ, նրանց ազատում են»,-ասաց Ռուբեն Մելիքյանը։

Մեր զրուցակցի խոսքով` այսօր ՀՀ-ում ամենակոշտ ձևով արվում է ամեն ինչ, որպեսզի հնարավորինս շատ անմեղ անձանց հնարավոր լինի դատապարտել, կալանավորել.

«Ամեն օր մենք նման դեպքեր ենք տեսնում, նույնիսկ՝ երեկ տեսանք, որ հերթական քաղաքացին էր ձերբակալվել և գրեթե երեք օր անազատության մեջ է պահվել՝ ընդամենը դավաճան կոչելու համար։ Դատաիրավական համակարգը առաջինը պետք է ազատել դատական համակարգի թշնամիներից, այնուհետև մտածել փոփոխությունների մասին»,-եզրափակեց նա։

Լիլիթ Զալիբեկյան