«Ադրբեջանը ձգտում է Հայաստանում տնտեսական աճի խափանմանը»

Ադրբեջանի գլխավոր դատախազ Քյամրան Ալիևը հայտարարել է, որ Երասխում մետաղաձուլական գործարանի կառուցումը «ծանր հանցագործություն է»։ Հունիսի 10-ին Ադրբեջանի ԶՈՒ-ն կրակել է Երասխի գործարանի աշխատակիցների վրա:

ԼՈՒՐԵՐ.com-ի զրույցում քաղաքագետ Գարիկ Քեռյանը ասաց, որ սա պարզապես կարելի է որակել քայլ՝ ուղղված Հայաստանում տնտեսական ներդրումների աճի խափանմանը, ուրիշ կերպ հնարավոր կլիներ դա ընկալել, եթե Ադրբեջանական կողմը հրավիրեր համապատասխան գերատեսչությունների և հայտներ իր մտահոգությունը տվյալ խնդրի շուրջ։

«Ադրբեջանի գործելավոճը ցույց է տալիս, որ իրենք բնապահպանությամբ չեն հետաքրքրված, եթե իրենք կրակում են գործարանի աշխատողների վրա` սա արդեն նշանակում է, որ նպատակն է խափանել Հայաստանում նմանատիպ խոշոր ձեռնարկության կառուցումը, որի հետևում իրենք տեսնում են Հայաստանի տնտեսական հզորացում»-ասաց մեր զրուցակիցը։

Քեռյանի խոսքով` եթե կան բնապահպանական խնդիրներ՝ պետությունը կարող է մեկ այլ պետության ներկայացնել իր պահանջները, պրակտիկայում դա բազմիցս եղել է, բայց, քանի որ Հայաստանը և Ադրբեջանը պատերազմական դրության մեջ են, նմանատիպ միջադեպերը կարող են հաճախ կրկնվել և դրական արդյունքի չբերել։

«Հայաստանի վիճակը բարդանում է նրանով, որ Արցախում լարված վիճակ է, անկայունություն է տիրում Սույունիքում, Գեղարքունիքում, ունենք շատ ծանր բանակցային շրջան։

Նմանատիպ բարդ իրավիճակում ես ուղղակի խուսափում եմ ասել, որ Հայաստանը լրացուցիչ ռեսուրսներ կկարողանա ներդնել այդ գործընթացին, որովհետև այնպես չէ, որ այդ մի խնդիրն է, դրանից առաջ այնքան ավելի կարևոր խնդիրներ կան, ես չեմ կարծում, որ Հայաստանի իշխանությունը կարողանա դրանով զբաղվել»,-նշեց Գարիկ Քեռյանը։

Լիլիթ Զալիբեկյան