Ռուսաստանը 2-րդ գիշերն անընդմեջ ԱԹՍ-ներով հարձակվում է Կիևի վրա (լուսանկարներ)

Ռուս զինվորականները երկրորդ գիշերն անընդմեջ անօդաչու սարքերով հարձակվում են Կիևի վրա։ Տեղի իշխանությունները հայտնել են, որ բոլոր թիրախները խոցվել են հակաօդային պաշտպանության միջոցով։ Օդային հարձակման ահազանգը հնչել է ամբողջ Ուկրաինայում և տևել գրեթե հինգ ժամ։

«Հայտնաբերվել է հակառակորդի անօդաչու թռչող սարքերի տեղաշարժը: Տարածաշրջանում գործում է հակաօդային պաշտպանություն: Պահպանե՛ք տեղեկատվական հիգիենան. մի՛ լուսանկարեք և մի՛ տեսանկարահանեք մեր պաշտպանների աշխատանքը: Մի անտեսեք անվտանգության կանոնները»,- հայտնել են Կիևի տարածաշրջանային ռազմական վարչությունում։

Կիևի քաղաքային վարչակազմի ղեկավար Սերխի Պոպկոն նույնպես կոչ է արել բնակիչներին մնալ ապաստարաններում՝ մինչև չեղարկվի օդային հարձակման նախազգուշացումը, որը մայրաքաղաքում տևել է ավելի քան երկու ժամ։ Նախնական տվյալներով՝ Ռուսաստանը կիրառել է «Շահեդ» տիպի հրթիռներ։

Ուկրաինայի Զինված ուժերի ռազմաօդային ուժերի հրամանատարության համաձայն՝ հուլիսի 12-ի գիշերը ռուսական զորքերը հարձակվել են Ուկրաինայի վրա 15 կամիկաձե անօդաչու թռչող սարքերով, որոնցից 11-ը խոցվել են հակաօդային պաշտպանության ուժերի կողմից։

Նախօրեին ռուս զինվորականները իրանական անօդաչու սարքերով հարձակվել էին Ուկրաինայի մայրաքաղաքի վրա։ Տեղական իշխանությունների խոսքով՝ բոլոր «Շահեդաները» խոցվել են հակաօդային պաշտպանության համակարգերի միջոցով։ Անօդաչու սարքերով զանգվածային հարձակման մասին հայտարարել է նաև Օդեսայի շրջանի ղեկավար Օլեգ Կիպերը։ Նրա խոսքով՝ ռուսական զորքերը «Շահեդների» մի քանի ալիք են ուղարկել։