Տեղացիներին ահաբեկելով, ծեծի ենթարկելով, իշխանությունները նպատակ ունեն կասեցնել «Հայաքվեի» գործընթացը․ Լիկա Թումանյան (տեսանյութ)

«Այս ամենը պարզագույն մեկնաբանություն ունի` իշխանությունների կողմից խոչընդոտներ ստեղծել, հակաքարոզչություն վարել ստորագրահավաքի կետերում, ահաբեկել տեղացիներին, որպեսզի չգան, չմասնակցեն և կասեցնել ընդհանուր գործընթացը»,-այս մասին ԼՈՒՐԵՐ. com-ի հետ զրույցում ասաց «Հայաքվե» նախաձեռնության անդամ Լիկա Թումանյանը` անդրադառնալով «Հայաքվեի» Մարտունու ներկայացուցիչների դեմ այսօրվա հարձակմանը։

Խոսքը, մասնավորապես, ըստ նախաձեռնության տեսանյութի այն մասին է, որ 10-12 հոգով մոտեցել են, թղթեր են պատռել, հարվածել «Հայաքվեի» ներկայացուցիչներին, ծեծի ենթարկել մի քանի ստորագրողների, փորձել են հարվածել ոստիկանների։

«Նպատակաուղղված վիավորել են արցախցի մի կնոջ, նրանք փորձում են անել ամեն ինչ, որպեսզի ստորագրահավաքը տեղի չունենա, բայց, իրականում, սա ճիշտ հակառակ արդյունքն է տալիս, որովհետև մարդիկ, տեսնելով իշխանությունների դիմադրությունը, էլ ավելի մարտական են տրամադրվում»,-ասաց Թումանյանը։

Զրուցակիցի խոսքով` իրենք արդեն ոտիկանություն են դիմել, հանցագործության մասին հաղորդում են կազմել, տեղեկացրել են ՄԻՊ գրասենյակին։

«Ստորագրահավաքը շարունակվում է, նախորդ շաբաթվա թվերը բավականին հուսադրող էին։ Ընդլայնել ենք ստորագրահավաքի կետերի աշխարհագրությունը, բացվել ենք բոլոր մարզերում, մարզկենտրոններում։

Մարդիկ զանգահարում և պահանջում են, որ իրենց համայնքում նույնպես ավելացնենք կետեր, որ իրենք էլ հնարավորություն ստանան մասնակցելու»,-ասաց Լիկա Թումանյանը և հավելեց, որ այն կետերը որտեղ իրենց ի սկզբանե մերժել էին, այդտեղից նույնպես արդեն ստացել են ստորագրահավաքի կետ բացելու համաձայնություն։

ԼՈՒՐԵՐ. com-ը ներկայացնում է այսօր Մարտունիում «Հայաքվեի» ներկայացուցիչներին և ստորագրողներին ծեծի ենթարկելու մասին պատմող բացառիկ տեսանյութ։

Լիլիթ Զալիբեկյան