Միացյալ Նահանգները մինչև այժմ չի կարողացել դրդել Ադրբեջանին բացել Լաչինի միջանցքը. Տաթևիկ Հայրապետյան

Հայաստանի և Ադրբեջանի արտգործնախարարներ Արարատ Միրզոյանը և Ջեյհուն Բայրամովը Վաշինգտոնում տեղի ունեցած վերջին հանդիպման ժամանակ բավական նեղացրել են այն հարցերի շրջանակը, որոնք դեռ մնում են չլուծված։ Այս մասին հայտնել է ԱՄՆ պետքարտուղարության խոսնակ Մեթյու Միլլերը։

ԼՈՒՐԵՐ.com-ը գրառման վերաբերյալ մեկնաբանություն ստանալու նպատակով զրուցեց ադրբեջանագետ Տաթևիկ Հայրապետյանի հետ։

«Միացյալ Նահանգները փորձում է ցույց տալ, թե իբրև գործընթացը խիստ դրական հունով է գնում, բայց իրողությունները գետնի վրա այլ են: Իրականությունը այն է, որ Միացյալ Նահանգները մինչև այժմ չի կարողացել դրդել Ադրբեջանին բացել Լաչինի միջանցքը և Արցախում այսօր 120 հազար հայեր հումանիտար լուրջ ճգնաժամի առաջ են կանգնած, ուստի, այդ գործընթացը ինձ համար ավելի շատ իմիտացիա է, քան գործողություն՝ միտված խաղաղության կառուցմանը»,- ասաց Հայրապետյանը:

Զրուցակցի խոսքով` Ադրբեջանի ղեկավարը վերջերս հայտարարեց, որ միջազգային իրավունքը չի գործում` գործում է ուժը և իրենք այդ նպատակով ամեն ջանք գործադրում են բանակի հզորացման ուղղությամբ, այսինքն, ևս մեկ անգամ վերահաստատեց, որ իրենք ուժով են տեսնում խնդիրների լուծումը.

 «Ես վստահ եմ, որ Ադրբեջանը չի գնա զիջումների, Ադրբեջանը շարունակում է իր ագրեսիվ գործելավոճը, սեղմում է օղակը Արցախի շուրջ, աննախադեպ իրավիճակ է իրականում և բոլորը խոսում են խաղաղությունից, բայց, կրկնում եմ, գործընթացները որևէ միտում չունեն խաղաղության կառուցման»,-նշեց նա:

Տաթևիկ Հայրապետյանը ասաց` երբեմն իշխանությունները անում են հայտարարություններ, որ թվում է, թե իրենք հասկանում են ինչ-որ բաներ, բայց հետո իրենց գործողությունները այդքան էլ տրամաբանության մեջ չեն հայտարարությունների հետ։ Օրինակ՝ իրենք նշում են, որ Արցախում էթնիկ զտման իրական վտանգ կա և հետո գնում են բանավոր խոստումներ են տալիս, Արցախը Ադրբեջանի մաս ճանաչելու հետ կապված.

«Բնականաբար, պետք է խոսել, բանակցել, բայց պետք է բանակցել՝ ունենալով բովանդակային օրակարգ, եթե դու բանակցում ես՝ գնալով ընդառաջ քո հակառակորդի կողմից թելադրված պայմաններին, ապա այդ բանակցությունները քեզ ոչ խաղաղություն են բերելու, ոչ էլ շահավետ են լինելու քո պետության համար, դրանք միայն մեծացնելու են ագրեսիայի ռիսկը», - եզրափակեց զրուցակիցը։

Լիլիթ Զալիբեկյան