Կոնֆերենցիաների լիգա․ «Փյունիկը» հաղթեց, «Արարատ-Արմենիան» բաց թողեց հաղթանակը

Ֆուտբոլի Կոնֆերենցիաների լիգայի որակավորման առաջին փուլի առաջին խաղում Հայաստանի փոխչեմպիոն Երեւանի «Փյունիկը» Աբովյանի «Քաղաքային» ստադիոնում ընդունեց էստոնական «Նարվա Տրանսին»: Եղիշե Մելիքյանի գլխավորած թիմն առավելության հասավ 2:0 հաշվով, հայտնում է sport.news.am-ը:

65-րդ րոպեին աչքի ընկավ բոսնիացի հարձակվող Լուկա Յուրիչիչը, որին գոլային փոխանցում կատարեց կիսապաշտպան Հովհաննես Հարությունյանը։

88-րդ րոպեին «Փյունիկի» առավելությունը կրկնապատկեց բրազիլացի պաշտպան Խամեսը։

Հայաստանի առաջնության բրոնզե մեդալակիր «Արարատ-Արմենիան» Ավանի Ֆուտբոլային ակադեմիայի մարզադաշտում հյուրընկալեց ալբանական «Էգնատիային» եւ ավելացված ժամանակում բաց թողեց հաղթանակը՝ 1:1։

36-րդ րոպեին հյուրերի դարպասը գրավեց բրազիլացի կիսապաշտպան Ալեմաոն։ Նրան գոլային փոխանցում կատարեց պորտուգալացի կիսապաշտպան Ադրիանո Կաստանեյրան։

«Էգնատիան» հաշվի հավասարությունը վերականգնեց ավելացված 7-րդ րոպեին։ Աչքի ընկավ գանացի հարձակվող Ռաֆայել Դվամենան։

Պատասխան հանդիպումները տեղի կունենան հուլիսի 20-ին։