«Բրյուսելյան հանդիպումից մեկ օր առաջ որևէ պահանջ չի դրվում բանակցողի առջև»

«Գիտեք` ես չգիտեմ` սա համաժողովրդակա՞ն շարժում է, թե ոչ, որովհետև շարժումը, սովորաբար, առաջնորդներ է ունենում, հստակ օրակարգ, ծրագիր, որը ներկայացվում է ժողովրդին, բայց այստեղ չկա նման բան։

Իհարկե ես ժողովրդից դուրս, առանձին չէի կարող լինել, ես ևս Վերածննդի հրապարակում էի, բայց ինձ մոտ շատ մեծ տարակուսանք առաջացրին այն կոչերը, որոնք հնչեցին բեմից»,- այս մասին ԼՈՒՐԵՐ. com- ի հետ զրույցում ասաց Արցախի Հանրապետության Ազգային ժողովի «Արդարություն» խմբակցության պատգամավոր Մետաքսե Հակոբյանը` անդրադառնալով Արցախի համաժողովրդական անժամկետ շարժմանը։

«Երկրի նախագահը չէր ուղղորդում որպես երկրի գերագույն գլխավոր հրամամատար, խոսում էր պետնախարարը` ամեն ինչ ներկայացնելով ապաքաղաքական, այն դեպքում, երբ այն պրոցեսները, որի արդյունքում մենք այս իրավիճակում ենք, դրանք հենց քաղաքական են և դու ապաքաղաքական կողմնորոշմաբ չես կարող այս պրոցեսների դիմաց կանգնել»,- ասաց Հակոբյանը:

Ըստ նրա՝ տարակուսելի էր նաև այն հանգամանքը, որ որևէ պահանջ չկար Հայաստանի իշխանություններին, պահանջը միայն ռուս խաղաղապահներից և Կարմիր խաչից էր.

«Իհարկե իրենց ևս պետք է պահանջ ներկայացվի, բայց շահագրգիռ կողմը պետք է լինի ՀՀ-ի իշխանությունը, որին որևէ հարց չտրվեց: Բրյուսելյան հանդիպումից մեկ օր առաջ տեղի ունեցող հանրահավաքում, որևէ պահանջ չի դրվում կոնկրետ բանակցողի առջև, դրա համար ես չեմ էլ ուզում որևէ կարծիք հայտնել և վերապահումով եմ մոտենում այն գործընթացներին, որը տեղի է ունենում։ Միայն թե ժողովրդին չօգտագործեն, որովհետև, իրականում, Արցախում ժողովուրդը հյուծված, զգացմունքային վիճակում է գտնվում և կրկին հերթական դավաճանական քայլը կլինի, եթե որևէ մեկը իր ծրագրերը ժողովրդի միջոցով փորձի իրականացնել»,-ասաց նա։

Հակոբյանի խոսքով` Արցախի իշխանությունները այսօր իրենց պահանջները պիտք է սկսեն Հայաստանի իշխանություններից, ինչը, ցավոք սրտի, շրջանցվում է.

«Շրջանցելով բանակցողին, որը հենց բանակցային սեղանին դրել է քեզ վաճառելը ու կործանելը և դիմել կամ պահանջել մյուս կողմերից՝ արդեն քաղաքական կեղտոտ խաղեր են, որի արդյունքում Արցախը մանրադրամի վերածած ուղղակի վաճառում, հանձնում են»,- եզրափակեց նա:

Լիլիթ Զալիբեկյան