Միամտություն է հուսալը, թե Փաշինյանը Արցախի ժողովրդի շահերից բխող քայլեր է անելու․ Էլինար Վարդանյան

ՀՀ նախկին արտգործնախարար Վարդան Օսկանյանն օրերս հայտարարությամբ է հանդես եկել, որում առաջարկել է, որպեսզի մեր բանակցային օրակարգում անպայման տեղ գտնի այն փաստը, որ սովետական շրջանում Արցախն ունեցել է ինքնավար կարգավիճակ։

«Հենց բանակցությունների սկզբում Նիկոլ Փաշինյանն անի հայտարարություն, որ չնայած Պրահայում, վկայակոչելով 1991թ Ալմա Աթայի հռչակագիրը, ստորագրել է հայտարարություն, որով ճանաչում է Ադրբեջանի տարածքային ամբողջականությունը` ներառյալ Արցախը, այդ հռչակագրում տեղ գտած տարածքային ամբողջականության ճանաչման գործոնը չի կարող ամուր հիմք ծառայել, որպեսզի ՀՀ–ն ճանաչի Ադրբեջանի տարածքային ամբողջականությունը` ներառյալ Արցախը։ Ալմա Աթայի այդ հռչակագիրը բազմակողմ հռչակագիր է և ոչ թե երկու երկրների միջև պայմանագիր»,-ասել է Օսկանյանը։

ԼՈՒՐԵՐ.com-ի հետ զրույցում, անդրադառնալով Օսկանյանի այս հայտարարությանը, «Հայաստան» խմբակցության պատգամավոր Էլինար Վարդանյանը ասաց` հույս ունենալ, որ Փաշինյանը բանակցային գործընթացում անելու է քայլեր, որոնք կարող են բխել Արցախի ժողովրդի շահերից՝ միամտություն է, այս պարագայում, թերևս, ճիշտ կլինի, որպեսզի Փաշինյանը գործը վստահի բանիմաց դիվանագետների և ինքը պարզապես լռի։

«Բանակցային գործընթացում Փաշինյանը բացառապես անում է այն, ինչ իրեն թելադրում են բանակցության մյուս կողմերը կամ բանակցություն կազմակերպողները, այսինքն, սեփական նախաձեռնություն Փաշինյանից սպասելը միամտություն է, հետևաբար, մենք ոչ այնքան բանակցող կողմ ենք, որքան բանակցության առարկա․ այսինքն, բանակցությունները ընթանում են մեր մասին՝ առանց մեր գործուն մասնակցության»,-ասաց նա։

Զրուցակցի խոսքով` 2020թ․-ից հետո յուրաքանչյուր հաջորդ օրը Հայաստանի և Արցախի համար ավելի ռիսկային և վտանգավոր է դառնում․

 «Երբ ասում են՝ Հայաստանը սպասելու ժամանակ չունի՝ խոսքը չի վերաբերում, որ Հայաստանը պետք է ստորագրի փաստաթուղթ, որը այսօրվա իշխանությունները կկոչեն խաղաղության, բայց, ըստ էության, կլինի հերթական կապիտուլյացիոն փաստաթուղթը, դա նշանակում է, որ Հայաստանը երեք տարվա ընթացքում արդեն իսկ պետք է լուծած լիներ Հայաստանի համար կարևորագույն անվտանգության խնդիրները, ինչպես նաև դաշնակիցների հետ նոր և ավելի վստահելի կապեր հաստատեր, երեք տարվա ընթացքում ոչինչ չի արվել և, ինչպես տեսնում ենք, ժամանակը այդքան էլ մեր օգտին չի ընթանում»,-նշեց պատգամավորը։