Ռոնալդուն դարձել է Գինեսի ռեկորդակիր

Պորտուգալացի ֆուտբոլիստ Կրիշտիանու Ռոնալդուն ընդգրկվել է Գինեսի ռեկորդների գրքում՝ որպես 2023 թվականի ամենաբարձր վարձատրվող մարզիկ։ Այս մասին հաղորդվում է կազմակերպության կայքում։

Արդեն երրորդ անգամ Կրիշտիանու Ռոնալդուն գլխավորել է Forbes-ի աշխարհի ամենաբարձր վարձատրվող մարզիկների ցուցակը՝ գրանցելով Գինեսի ռեկորդ 2023 թվականին մարզիկների շրջանում ամենաբարձր տարեկան եկամտի համար։

Forbes ամսագրի տվյալներով՝ մարզիկի եկամուտը տարվա կտրվածքով կազմել է 136 միլիոն դոլար, որից 46 միլիոնը վաստակել է ֆուտբոլի դաշտում, իսկ 90 միլիոնը՝ դրանից դուրս։

Ցուցակի երկրորդ տեղում արգենտինացի Լիոնել Մեսսին է, ում տարեկան եկամուտը կազմել է 130 մլն դոլար։ Եռյակը եզրափակում է ֆրանսիացի Կիլիան Մբապեն՝ 120 մլն դոլար եկամտով։