Եվրախորհրդարանը Թուրքիային կոչ է արել ճանաչել Հայոց ցեղասպանությունը

Եվրախորհրդարանի արտաքին հարաբերությունների հանձնաժողովը կոչ է արել Թուրքիային ճանաչել Հայոց ցեղասպանությունը՝ թուրք և հայ ժողովուրդների իրական հաշտեցման ճանապարհ հարթելու համար։ Կոմիտեն Անկարային կոչ է արել ամբողջությամբ կատարել հայկական մշակութային ժառանգության պաշտպանության հարցում ստանձնած պարտավորությունները, հայտնում է ԵՄ-ում Հայաստանի ներկայացուցչությունը։

Կոմիտեն աջակցել է Հայաստանի և Թուրքիայի միջև հարաբերությունների կարգավորմանը՝ հիմնվելով հաշտեցման, տարածաշրջանային կայունության և անվտանգության շահերի վրա։ Կոմիտեն նաև կոչ է արել արագ իրականացնել հատուկ ներկայացուցիչների պայմանավորվածությունները, ինչպիսիք են երկու երկրների օդային տարածքի և սահմանների բացումը, և ողջունել է արձանագրված առաջընթացը՝ գոհունակությամբ նշելով ՀՀ վարչապետ Նիկոլ Փաշինյանի ներկայությունը Թուրքիայի նախագահ Ռեջեփ Թայիփ Էրդողանի երդմնակալության արարողությանը։