Ադրբեջանի ԱԳՆ-ն արձագանքել է Միրզոյանի հայտարարությանը

Ադրբեջանի ԱԳՆ-ն արձագանքել է ՀՀ ԱԳ նախարար Արարատ Միրզոյանի հայտարարությանը Ադրբեջանի կողմից Արցախի շրջափակմանն ու դրա հետևանքով ստեղծված իրավիճակի մասին, գրում է APA-ն։

«Այն փաստը, որ Ադրբեջանի տարածքային ամբողջականությունն ու ինքնիշխանությունը հարգելու փոխարեն՝ Հայաստանի արտգործնախարարը խոչընդոտում է խաղաղության գործընթացին՝ վկայակոչելով շուրջ 30 տարի Ղարաբաղում ապրող հայերի իրավունքներն ու անվտանգությունը, վկայում է հայ պաշտոնյաների իրական մտադրությունների մասին: Անընդունելի է «Ղարաբաղի բնակչություն» ասելով նկատի ունենալ միայն հայ բնակիչների իրավունքները և անտեսել ադրբեջանցի բնակիչների իրավունքներն ու անվտանգությունը։
Տարածաշրջանում լարված հումանիտար իրավիճակի մասին հայտարարությունները քաղաքական արկածախնդրություն են։ Ադրբեջանի առաջարկած Ակնա-Ստեփանակերտ ճանապարհով բեռնափոխադրումների վերաբերյալ առարկությունն այս պնդումների անհիմն լինելու օրինակ է», - ասվում է Ադրբեջանի ԱԳՆ հայտարարության մեջ։

Հիշեցնենք, որ ՀՀ ԱԳ նախարար Արարատ Միրզոյանը երեկ՝ հուլիսի 18-ին, Վիեննայում Ավստրիայի եվրոպական և միջազգային հարցերի դաշնային նախարար Ալեքսանդր Շալենբերգի հետ մամուլի ասուլիսում հայտարարել էր, որ «Լեռնային Ղարաբաղը կանգնած է մարդասիրական աղետի եզրին։ Դա տեղի է ունենում միջազգային մարդասիրական նորմերի խախտումներով և ի հեճուկս միջազգային դերակատարների բազմաթիվ կոչերի ու բանաձևերի»։

Ինչպես հայտնել ենք, երեկ արցախցիները բետոնե արգելապատնեշներով փակել են Ասկերան-Ակնա ճանապարհը։