Փաշինյանին տրված բոլոր խոստումները կատարվել են. Միշուստին

«Սոչիում մենք Նիկոլ Փաշինյանին տվել ենք խոստումներ, որոնք խստորեն կատարվել են»,-այս մասին ասել է Ռուսաստանի Դաշնության վարչապետ Միխայիլ Միշուստինը՝ շնորհակալություն հայտնելով տրանսպորտի նախարարության, Դաշնային մաքսային ծառայության և այլ գերատեսչությունների աշխատակիցներին՝ Վրաստանի հետ սահմանին գտնվող Վերին Լարսի անցակետի թողունակությունը մեծացնելու համար, գրում է ՏԱՍՍ-ը։

Դաշնային մաքսային ծառայության ղեկավարի պաշտոնակատար Ռուսլան Դավիդովը հուլիսի 19-ին նախարարների կաբինետի ղեկավարի հետ հանդիպման ժամանակ զեկուցել է, թե ինչպես է բարելավվում անցակետերի աշխատանքը։ Նրա խոսքով, այն վայրերում, որտեղ դժվար է երթևեկությունը, ինչպես Վերին Լարսում, լրացուցիչ հարթակներ են ստեղծվում։

«Այս մասին խնդրել է ՀՀ վարչապետ Նիկոլ Վովաևիչ Փաշինյանը»,- ի պատասխան՝ հիշել է Միշուստինը։ «Սոչիում մենք նրան տվել ենք համապատասխան խոստումներ, որոնք խստորեն կատարվել են։ Ցանկանում եմ շնորհակալություն հայտնել մաքսավորներին, ովքեր տրանսպորտի նախարարության և այլ գերատեսչությունների մասնագետների հետ միասին ակտիվ մասնակցություն են ունեցել՝ ապահովելու, որ Վերին Լարսին առնչվող բոլոր հարցերը խորքային լուծվեն»,- հավելել է վարչապետը։

Դավիդովն իր հերթին խոսել է այն մասին, թե ինչպես են ընթանում համատեղ աշխատանքները Վերին Լարսում։ «Հայ գործընկերները մեզ օգնում են նաև համակարգել աշխատանքը վրացի գործընկերների հետ»,- ասել է Դավիդովը։

Ներկայումս Հայաստանի և Ռուսաստանի միջև բեռնափոխադրումները կատարվում են ցամաքային ճանապարհով՝ Վերին Լարսի սահմանային անցակետով։ Հայաստանի փոխվարչապետ Մհեր Գրիգորյանն ավելի վաղ նշել էր, որ Վերին Լարսի անցակետով երթևեկության գոտիների թիվը 11-ից հասել է 39-ի, իսկ բեռնատարների առավելագույն հոսքը օրական 300-ից դարձել է 1400 տրանսպորտային միջոց։