Մեկ օրում բացահայտվել է 65 հանցագործության դեպք. գրանցվել է 11 ավտովթար, վիրավորվել է 19 մարդ

Ըստ ոստիկանության օպերատիվ հաղորդագրությունների ամփոփագրերի՝ հուլիսի 19-ից 20-ը Հայաստանի Հանրապետության ոստիկանության ստորաբաժանումները բացահայտել են հանցագործության 65 դեպք, որից 2-ը՝ նախկինում կատարված։

Ոստիկանությունից հայտնում են, որ մասնավորապես՝ մարմնական վնասվածք պատճառելու՝ 13, խարդախության և թմրամիջոցի հայտնաբերման՝ 9-ական, ֆիզիկական ներգործության՝ 4, հոգեկան ներգործության, անձնական ունեցվածքի գողության, պաշտոնեական կեղծիքի կամ անփութության, բնական գազի, նավթի, ջրի խողովակաշարերին կամ էլեկտրական ցանցին, հեռահաղորդակցության, էլեկտրոնային հաղորդակցության միջոցներին ապօրինի միացում կատարելու և շրջանառությունն արգելված թմրամիջոցներ, բույսեր ցանելու կամ աճեցնելու՝ 3-ական, վստահված գույքը հափշտակելու՝ 2, մարդու առևանգման, սեքսուալ բնույթի բռնի գործողությունների, ավտոմեքենայի գողության, պաշտոնատար անձի ծառայողական գործունեությանը միջամտելու, զենք-զինամթերքի առգրավման, թմրանյութի իրացման, անօրինական միգրացիայի կազմակերպման, արգելանքի վերցված, ձերբակալված, կալանավորված անձի փախուստը կամ ազատությունից զրկելու հետ կապված պատիժը կրելուց խուսափելու և փաստաթղթեր, դրոշմներ, կնիքներ, ձևաթղթեր կեղծելու կամ կեղծ փաստաթղթեր, դրոշմներ, կնիքներ, ձևաթղթեր իրացնելու, պատրաստելու կամ օգտագործելու՝ 1-ական դեպք։

Հայտնաբերվել է 4 հետախուզվող։ Կամավոր ներկայացել է 2 հետախուզվող։

Գրանցվել է զենք-զինամթերքի կամավոր հանձնման 2 դեպք։

Նախկինում կատարված հանցագործություններից բացահայտվել է անձնական ունեցվածքի գողության և ավտոմեքենայի գողության 1-ական դեպք։

Անցած 1 օրվա ընթացքում հանրապետությունում արձանագրվել է ճանապարհատրանսպորտային 11 պատահար. 19 մարդ ստացել է տարբեր աստիճանի մարմնական վնասվածքներ: