Աշխարհում փոքրիկ Արցախի հարցով է առաջանալու մեծ քաոսը. Մետաքսե Հակոբյան

Արցախի Հանրապետության Ազգային ժողովի նախագահ Արթուր Թովմասյանն այսօր ուղերձով դիմել է Միավորված ազգերի կազմակերպության մշտական անդամ երկրների ղեկավարներին․

«Արցախի Հանրապետությունում ապրող ժողովրդի հիմնական մեղքը նրանում է, որ մենք անմեղ ենք: Ադրբեջանը բազմազգ երկիր է, հազարամյակներ շարունակ մենք ապրել ենք կողք-կողքի: Այսօր էլ պատրաստ ենք մեր հարևանների հետ ապրել «հավասարը՝ հավասարի» սկզբունքով: Այդ դեպքում տանկը կփոխարինենք տրակտորով, ինքնաձիգը՝ բահով»,-ասված է հայտարարության մեջ:

ԼՈՒՐԵՐ.com-ի հետ զրույցում ԱՀ «Արդարություն» խմբակցության պատգամավոր Մետաքսե Հակոբյանը նշեց, որ իրենք պարտավոր են առաջարկել այդ լուծումը, որովհետև, եթե հերթական անգամ անտեսվի մեր ուղերձը, կոչը՝ մենք նորից կարձանագրենք աշխարհի երկակի ստանդարտները, որ այլևս չկա որևէ քաղաքակրթություն, չկա դասական քաղաքականություն, այլ կա ընդամենը ուժի, փողի և շահերի լեզուն, և ըստ էության կփաստենք, որ 120 հազար հայերը իրենց շահերի դեմ առ ոչինչ են և ինքներս պետք է կարողանանք մեզ պաշտպանել․ 

 «Մենք պաշտպանություն կարող ենք ունենալ, եթե այդ երկակի ստանդարտները Հայաստան ու Արցախ բերած հանցավոր խմբակը ուղղակի հեռացվի Երևանի կենտրոնից, քանի դեռ իրենք կան՝ մենք ստիպված ենք հուսալ, որ ի վերջո, միջազգային հանրությունը կհասկանա, որ եթե ինքը չի կանգնեցնում ու չի սաստում Ադրբեջանին, ապա դա վատ նախադեպ է լինելու աշխարհի համար և Ադրբեջանով չի ավարտվելու, շատ երկրներ սկսելու են նույն մեթոդին դիմել, աշխարհում, ըստ էության, այս փոքրիկ Արցախի հարցով է առաջանալու մեծ քաոսը»,- ասաց Հակոբյանը։

Զրուցակցի խոսքով` ամեն բան փոխվեց 2018-ից սկսած, երբ Հայաստանում իշխանությունը  զավթեցին թուրքահպատակները և սկսեցին ներկայացնել, որ բոլոր լուծումները պետք է ընդունելի լինեն Արցախի և Հայաստանի ժողովրդի համար և մարդկանց մոտ կեղծ ինչ-որ օրակարգեր ձևավորեցին ու սկսեցին հավատացնել, որ դարերով  յաթաղանից վիզը կտրած հայը կարող է արդեն գլուխը բարձր ընկերություն անել թշնամու հետ․

 «Մենք այդ թշնամին չունենք, որի հետ կարելի է խաղաղ և հանգիստ ապրել և դա մեր ընտրությունը չէ, որովհետև հայը, լինի Արցախում, թե Հայաստանում, ամենախաղաղասերն է և ամենաշատը գիտի խաղաղության գինը, սակայն, մեր թշնամին այդպիսին չէ, նա երբեք չի ապրելու խաղաղ, նա միշտ, ամեն վայրկյան ձգտելու է մորթել ու սպանել»,-ասաց նա։

Լիլիթ Զալիբեկյան