Սերժ Սարգսյանի նամակը իրավիճակը շտկելու փորձ է․ նախկին իշխանությունների մոտ մեծ գործիքակազմ չկա․ քաղաքագետ

«Սերժ Սարգսյանի բաց նամակը ազդեցություն դժվար ունենա, բայց, ամեն դեպքում, պետք է հասկանալ, որ նախկին իշխանությունների մոտ շատ մեծ գործիքակազմ չկա, և այդ առումով նմանատիպ քայլերը իրավիճակը շտկելու փորձեր են»,- ԼՈՒՐԵՐ․com-ի հետ զրույցում այս տեսակետը հայտնեց քաղաքագետ Տիգրան Գրիգորյանը` անդրադառնալով Սերժ Սարգսյանի՝ ԱՄՆ-ի, ՌԴ-ի և Ֆրանսիայի նախագահներին ուղղված բաց նամակին։

«Կարելի է իշխանություններից  պահանջել, որպեսզի ակտիվ քայլեր ձեռնարկեն խնդրի լուծման ուղղությամբ, վերջիվերջո, միջազգային կառույցների հետ շփվողները հենց իշխանություններն են։

Ակնհայտ է, որ Արցախում վիճակը ծայրահեղ ծանր է, իսկ Հայաստանում այնպիսի իրավիճակ է ստեղծվել, կարծես ոչ մի արտառց բան տեղի չի ունենում, և իշխանությունների պահվածքի մեջ էլ մենք չենք տեսնում որևէ հրատապություն։ Միջազգային կառույցների նկատմամբ պահանջներ կարող են հնչեցվել նաև քաղաքացիական հասարակության, քաղաքական գործիչների կողմից, այսինքն, այս երկու գործընթացները միմյանց չեն բացառում»,- ասաց մեր զրուցակիցը։

Գրիգորյանի խոսքով` Նիկոլ Փաշինյանը ընտրություններին մասնակցել է այլ օրակարգով, մասնավորապես, Արցախի հարցում միայն ընտրություններից հետո է փոխել իր մոտեցումները բանակցային գործընթացի վերաբերյալ, սակայն, այսօր կան բազմաթիվ սոցհարցումներ, որոնք ցույց են տալիս, որ Հայաստանի բնակչության մեծամասնությունը չի աջակցում կառավարության մոտեցումներին ու քաղաքականությանը Արցախի հարցում։

«Առկա իրավիճակում մարդիկ, որոնք փորձում են ինչ-որ ազդեցություն ունենալ ստեղծված իրավիճակի վրա, շատ մեծ գործիքակազմ չունեն և ստիպված տարբեր ակցիաների և նմանատիպ գործողությունների են դիմում՝ փորձելով ինչ-որ մասնակցություն ունենալ իրավիճակի շտկման գործում։ Պետք է նստել և ինչ-որ քայլերի հաջորդականություն կամ ճանապարհային քարտեզ մշակել, պետք է  բարձրացնել միջազգային ճնշումը Ադրբեջանի վրա, մինչև Արցախում իրավիճակը չմեղմվի՝ ընդհանրապես հրաժարվել բանակցություններից Ադրբեջանի հետ»,- ասաց Տիգրան Գրիգորյանը և հավելեց` եթե, իհարկե, նմանատիպ պատրաստակամություն լինի իշխանությունների կողմից։

Լիլիթ Զալիբեկյան