Մենք գործ ունենք մի շատ վատ իրավիճակի հետ, որտեղ բոլորը վարում են իրենց շահերից բխող քաղաքականություն. Բաբայան

«Պահանջում եմ 2020թ. նոյեմբերի 9-ի եռակողմ հայտարարության կողմերից գործնական քայլեր ձեռնարկել՝ ապահովելու Լաչինի միջանցքի իրավական ռեժիմի անհապաղ վերականգնումը»,-այս մասին կոչով Արցախի նախագահ Արայիկ Հարությունյանը դիմել է Հայաստանի, Ռուսաստանի և Ադրբեջանի արտաքին գործերի նախարարներին։

ԼՈՒՐԵՐ.com-ի հետ զրույցում ԱՀ ԱԳ նախկին նախարար Դավիթ Բաբայանը ասաց, որ  իրավիճակը շատ բարդ է և իրենք պարտավոր են կոչերով դիմել, մինչև արդեն կոնկրետ քայլերի դիմեն․

«Եթե Հայաստանը հավուր պատշաճի կատարի իր աշխատանքը՝ մնացած բոլորը կանեն նույնը, հետևաբար, պետք է սկսել մեզանից։

Ռուսաստանը համարվում է եռակողմ պայմանագրի ստորագրող կողմ և նա նաև պետք է ապահովի այստեղ խաղաղություն, կայունություն, բայց ոչ միայն Ռուսաստանը։ Կա միջազգային դատարանի որոշումը, իսկ դրանից հետո Միշելը և մնացածները սարսափելի հայտարարություններ են անում` ճանաչում են Արցախը Ադրբեջանի մաս՝ Աղդամը նույնացնելով Բերձորին, բայց իրենք արդարանում են՝ աչքներս մտցնելով Երևանի պատասխանը․ մենք գործ ունենք մի շատ վատ իրավիճակի հետ, որտեղ բոլորը վարում են իրենց շահերից բխող քաղաքականություն»,- ասաց Բաբայանը։

Ըստ նրա` Ալիևը  կոպտորեն խախտում է տարբեր տիպի միջազգային օրենքներ, նորմեր, պայմանավորվածություններ, ինչպես նաև նոյեմբերի 9-ի պայմանագիրը․

«Եթե Երևանը ասում է, թե ճանաչում է Ադրբեջանի տարածքային ամբողջականությունը Արցախի հետ մեկտեղ՝ Ադրբեջանը սա օգտագործում է և էլ ավելի է քաջալերվում։

Պետք է սկսենք մեզանից, ոչ թե որևէ այլ մեկին մեղադրենք։ Եթե հարյուրավոր, հազարավոր մարդիկ իրենց կամքը արտահայտեն՝ ինչպե՞ս կարող է տեղաշարժ տեղի չունենա: Տեղաշարժը առաջինը կախված է ՀՀ-ից, որովհետև, երբ միջազգային հանրությանը դիմում ենք, ասում են` ինչ եք ասում Հայաստանը ձեզ ճանաչել է Ադրբեջանի կազմում և այնպես են ասում, կարծես Ադրբեջանը վտանգ չի ներկայացնում»,- ասաց Բաբայանը։

Լիլիթ Զալիբեկյան