Արցախի խնդիրը Արցախի ժողովրդի ցանկությամբ պետք է լուծվի․ ՔՊ-ական պատգամավոր

«Իշխանությունը Արցախի  խնդրի ուղղությամբ անում է ամեն ինչ, բայց, բոլոր դեպքերում, առանց միջազգային կառույցների աջակցության, խնդրի լուծումը շատ դժվար է»,-ԼՈՒՐԵՐ.com-ի հետ զրույցում ասաց ՀՀ ԱԺ պատգամավեր Հովիկ Աղազարյանը` անդրադառնալով ՀՀ վարչապետ Նիկոլ Փաշինյանի՝ թվիթերի միկրոբլոգի գրառմանը, որտեղ ասվում է, որ Հարավային Կովկասում խաղաղություն հնարավոր է, բայց միայն քաղաքակիրթ աշխարհի ակտիվ աջակցությամբ, և որ միջազգային հանրությունը պետք է վճռական քայլեր անի` վերջ տալու Սարաևոյի ոճով ԼՂ պաշարումը։

«Արցախի խնդիրը կունենա լուծում, և այդ խնդրի լուծումը լինելու է այն, ինչ, որ ցանկանա Արցախի ժողովուրդը, և մեր հայրենակիցների կողմից ընտրված օրինական իշխանությունները խնդրի լուծումը կներկայացնեն նախատեսված հարթակներին»,- ասաց Աղազարյանը։

Այն հարցին, թե Արցախի պետնախարարը նաև կոչ է անում Հայաստանին զբաղվել Արցախի խնդրով, արդյոք ասվածից կարելի է արձանագրել, որ Հայաստանը չի կատարում իր պարտականությունները, պատգամավորը նշեց․

«Հայաստանը անում է ամեն ինչ, բայց դա իրար չի հակասում, որովհետև եթե ինչ-որ մակարդակի վրա պետք է հարցերը լուծվի, ապա դրա համար դիմում են եռակողմ պայմանագրի կողմերին։

Ես չեմ կարծում, որ Ռուսաստանը լիարժեք կատարում է իր պարտականությունը, չնայած դրա համար կան բազմաթիվ պատճառներ, բայց այն, ինչ, որ անում է, պետք չէ թերագնահատել։ Ռուսաստանը այս խնդրին կարող է լուծում առաջարկել, դա փաստում է եռակողմ պայմանագրի տակ ստորագրելու հանգամանքը, ինչպես նաև տարածաշրջանի բազմաթիվ գործընթացներում Ռուսաստանի իտեգրված լինելը», - ասաց Հովիկ Աղազարյանը։

Լիլիթ Զալիբեկյան