Apple-ը նոր iPhone է պատրաստում

Apple-ը մտադիր է մինչև 2025 թվականը թողարկել ամբողջովին առանց շրջանակի iPhone: Ընկերությունն արդեն դիմել է իր OLED էկրանների վաճառողներին՝ մշակելու նոր տեսակի էկրաններ, որոնք կհամապատասխանեն ապագա սարքերի դիզայնին, հայտնում է կորեական The Elec հրատարակությունը:

Աղբյուրի համաձայն՝ Apple-ը չի ցանկանում օգտագործել ներկայիս նոր սերնդի OLED էկրանները, որոնք ունեն մի փոքր կլորացված եզրեր՝ առանց շրջանակի էֆեկտ ստանալու համար: Ընկերությունը կարծում է, որ նման էկրանները կարող են օպտիկական աղավաղումներ առաջացնել և բավականաչափ հուսալի չեն։ Ուստի, Apple-ն առաջարկել է Samsung-ին և LG Display-ին ստեղծել տեսանելի շրջանակներից զուրկ հարթ էկրաններ:

Ըստ The Elec-ի՝ Apple-ի առաջին սմարթֆոնները՝ առանց շրջանակի էկրանով, կլինեն iPhone 17 Pro-ն և 17 Pro Max-ը, որոնք թողարկվելու են 2025 թվականին: Բացի այդ, այս մոդելները կհամալրվեն էկրանի տակ թաքնված Face ID դեմքի սկաներով։ Այս դեպքում սելֆիի տեսախցիկը դեռևս տեսանելի կմնա։

2023 թվականի աշնանը Apple-ը կներկայացնի iPhone 15 սմարթֆոնների շարքը։