Ակցիաները պետք է շատանան․ մենք հակահայկական դիրքորոշում չենք ընդունելու․ դա պետք է աշխարհը հասկանա․ Թևան Պողոսյան

«Մարդը համարում է, որ հայկական ամեն ինչը վատ է, դա մարդու բնույթն է, արժեքային համակարգը»,- ԼՈՒՐԵՐ.com-ի հետ զրույցում այս տեսակետը հայտնեց Մարդկային զարգացման միջազգային կենտրոնի ղեկավար Թևան Պողոսյանը` անդրադառնալով Նիկոլ Փաշինյանի՝ երեկվա ասուլիսում արված այն հայտարարությանը, թե Երևանում ի պաշտպանություն Արցախի կազմակերպված ակցիաները «ադրբեջանական գործառույթ են»։

«Հայ ազգը պետք է արթնանա և գործողություն անի, ակցիաները շատ լավ են, բայց չի կարելի այդ մի գործողությամբ սահմանափակվել։ 1991-1994 թվականներն էլ են ապացուցել այդ փաստը, այն ժամանակ էլ է հազարավոր նամակներ գրվել, բայց ոչ մի լուծում չէր լինում, մինչև հայոց բանակը կարողացավ կյանքի կոչել մեր պատմական երազանքը և ազատագրեց հայրենիքը և դրանով նպաստեց, որ երեսուն տարի անվտանգ ապրում էինք, մինչև եկան ուժեր, որոնք որոշեցին, որ հայ ազգին պետք չէ անվտանգ ապրել, պետք է միշտ վախի մեջ ապրի, հաղթանակի ձեռքը կրակն էինք ընկել, պետք է անպայման այդ ամենը փչացնեինք»,-ասաց մեր զրուցակիցը։

Պողոսյանի խոսքով` թշնամին Երևանն էլ է ուզում, և Արցախը այսօր պաշտպանում է Հայաստանը, եթե Արցախը չլինի՝ Հակաստանն էլ չի լինելու.

«Նույնիսկ երեկ Արցախի պետնախարարն էլ ասեց, որ նրանք պատրաստ են կրել զրկանքներ հանուն Հայաստանի և դա անցած դեկտեմբերին էլ են ասել։

Ակցիաները պետք է շատանան և աշխարհին բացատրենք, որ մենք հակահայկական դիրքորոշում չենք ընդունելու։ Եթե աշխատենք՝ տեղաշարժ կունենանք, եթե տունը նստենք, ոչ մի բան չանենք՝ ի՞նչ տեղաշարժ, փոփոխությունը գալիս է, երբ գործողություն ենք կատարում։ Երեկվա ակցիաներին հազարավոր մարդիկ հետևում էին սոցցանցերով, որ հրապարակում լինեին՝ ավելի շատ բան կփոխվեր»,- ասաց նա։

Լիլիթ Զալիբեկյան