Արցախի իշխանությունները չպետք է խուսափեն հիմնական մեղավորի անունը տալուց. Արմեն Պետրոսյան

ԼՈՒՐԵՐ.com-ի հետ զրույցում Արցախի անվտանգության և զարգացման ճակատ շարժման խորհրդի անդամ Արմեն Պետրոսյանը, անդրադառնալով Արցախի նախագահ Արայիկ Հարությունյանի հայտարարությանը, թե դադարեցրել է նստացույցը, ասաց, որ Հանրապետության նախագահը հասարակական կազմակերպության նախագահ չէ, երկրի ղեկավարը չպետք է զբաղվի նստացույցով կամ որևէ այլ ակցիաներով, նա պետք է լինի իր տեղում` կազմակերպի երկրի անվտանգությունը, սահմանադրական իրավունքները ապահովի։

«Նստացույցերը կամ այլ պրոցեսները, որոնք կարող են միջազգային հանրության ուշադրությունը գրավել, իհարկե ողջունելի են, բայց ավելի լավ կլինի, երբ ներքին լսարանը նույնպես ահաբեկված չլինի, այսինքն, չխուսափի հիմնական մեղավորի անունը տալուց, ինչը տեսել ենք թե ՀՀ-ում, թե ԱՀ-ում իրականացված հանրահավաքների ժամանակ, ոչ մի անգամ չի նշվել այս իրավիճակի հիմնական մեղավորների անունները»,- ասաց Պետրոսյանը։

Ըստ նրա՝ դրական տեղաշարժ կունենանք, երբ  փոխվի բանակցողը, այսինքն, Հայաստանում պետք է տեղի ունենա  իշխանափոխություն, և եթե իշխանափոխություն չլինի, ապա Հայաստանի իշխանությունների որդեգրած քաղաքական կուրսը արցախցիներին տանում է դեպի ինտեգրում կամ հայաթափում, իսկ Հայաստանը, հեռացնելով հիմնական դաշնակցին, դառնալու է թուրքական վիլայեթ․

«Ինչ վերաբերում է Մոսկվայում կամ այլ տեղերում հանդիպումներին՝ նման հանդիպումներ բազմիցս են եղել և մենք պետք է փնտրենք ոչ թե դաշնակիցների, այլ մեր հիմնական դաշնակցին՝ Ռուսաստանի Դաշնությանը, որը որ այսօր ապահովում է Արցախի անվտանգությունը, իրենց հետ կկարողանանք մեր հետագա քայլերը մշակել»,- ասաց նա և հավելեց, որ սոցիալական բարդ վիճակը ժողովրդի մոտ առաջացնում է նաև դժգոհություններ, ինչը կարող են որոշ ուժեր օգտագործել հակառուսական տրամադրություններ ստեղծելու նպատակով։

Լիլիթ Զալիբեկյան