Գեղարքունիքի մարզում արդեն կուտակվել է շուրջ 13 հազար 500 տոննա անասնակեր

Գեղարքունիքի մարզի անասնապահական տնտեսություններում մոտ 20 օր  տևած բերքահավաքի ընթացքում արդեն կուտակվել է շուրջ 13 հազար 500 տոննա անասնակեր։

Ինչպես տեղեկացրեց Գեղարքունիքի մարզպետի աշխատակազմի գյուղատնտեսության և շրջակա միջավայրի պահպանության վարչության պետ Մարտին Պետրոսյանը, առավել շատ քանակության անասնակեր՝ 7500 տոննայի չափով, կուտակվել է Վարդենիս համայնքի տնտեսություններում, Ճամբարակ համայնքում կուտակվել է 3 հազար, Գավառ համայնքում՝ 850, Մարտունի համայնքում՝ 700, Սևան համայնքում՝ 400 տոննա անասնակեր։ Բերքահավաքն հիմնականում ավարտված է ցածրադիր գոտիներում և աստիճանաբար տեղափոխվում է բարձրադիր գոտիների բնական խոտհարքներ, որտեղ առկա է առատ բուսականություն։

«Անասնակերի բերքահավաքը գնալով ավելի մեծ  թափ է հավաքում։ Նախորդ տարում կուտակած 125 հազար տոննայի փոխարեն այս տարի ակնկալում ենք մինչև 250 հազար տոննա անասնակերի կուտակում, որը միանգամայն բավարար, նույնիսկ ավելին կլինի՝ անասնագլխաքանակի լիարժեք ձմեռումն ապահովելու համար»,-ներկայացրեց  Մարտին Պետրոսյանը։

Անասնակերի բերքահավաքը Գեղարքունիքի մարզում կշարունակվի մինչև սեպտեմբեր ամսի երկրորդ կեսը։