Թեյլոր Սվիֆթն առատաձեռնորեն պարգևատրել է իր օգնականներին

Ամերիկացի փոփ աստղ Թեյլոր Սվիֆթը իր իրերը փոխադրող վարորդներին 100.000-ական դոլար է տվել՝ որպես երախտագիտություն իրենց աշխատանքի համար: Այս մասին գրում է TMZ-ը՝ վկայակոչելով երգչուհուն ծանոթ աղբյուրին։

Լրատվամիջոցների տեղեկություններով՝ երգչուհին Կալիֆորնիայի Սանտա Կլարա քաղաքում համերգից առաջ 50 վարորդների չեկեր է տվել։ Վարորդները նրա համերգների համար սարքավորումներ էին տեղափոխում Ամերիկայով մեկ՝ Սվիֆթի Eras շրջագայության շրջանակներում: Հաղորդվում է նաև, որ կատարողը չի մոռացել նաև մյուս օգնականներին՝ ոճաբաններին, դիմահարդարներին, ձայնային օպերատորներին, պարուհիներին և շրջագայության ընթացքում իր հետ աշխատած այլ մասնագետներին։

Թե կոնկրետ ինչ գումարների մասին է խոսքը, հայտնի չէ, սակայն ինսայդերը վստահեցրել է, որ Սվիֆթը «առատաձեռնորեն պարգեւատրել է» իր օգնականներին։ Աղբյուրը նաև ենթադրել է, որ շրջագայության ընթացքում Սվիֆթի եկամուտը, հնարավոր է, որոշ ռեկորդներ է սահմանել շոու-բիզնեսի աշխարհում, քանի որ հյուրախաղերից նրա եկամուտն արդեն գերազանցում է 1 միլիարդ դոլարը: